Tulo patay sa aksidente sa kadalanan
CEBU, Philippines – Tulo ka tawo, apil ang usa ka retirado’ng maestra, nangamatay samtang usa ka tuig nga bata naangol sa disgrasya sa karsada sa lainlaing lugar sa probinsya sa Sugbo niadtong Lunes.
Ang mga nangamatay mao sila si Perla Ocariza, 63, taga Poblacion, Alcantara, Aurelia Anor, 51, taga Alcoy, ug Feleciano Cuizon, 60, taga Sibonga. Ang naangol mao ang bata nga si Rhea Mae Anor, apo ni Aurelia.
Si Ocariza, biyuda, motabok unta sa karsada didto sa Poblacion, Alcantara diha nga nadasmagan siya sa motorsiklo nga gimaneho ni Alvin Alcosero, 27, taga Cogon, Dumanjug ug wa’y lisensya. Matud ni SPO4 Saldy Orillo, deputy chief sa Alcantara Police Station, nga gipasakaan na nila’g kaso si Alcosero kay wala makig-settle ang pamilya ni Ocariza.
Si Aurelia Anor naglakaw sa karsada didto sa Barangay Atabay, Alcoy diha nga gidam-agan sa Kia Sedan nga gimaneho ni Eleazar Retuya Jr., 33, taga Upper Lusimba, Barangay Pardo, dakbayan sa Sugbo.
Matud ni PO3 Rosendo Binondo sa Alcoy Police nga gikang nanan-aw og butanding ang drayber ug iyang mga kauban.
Samtang sila nagdagan, ang nagsunod kanila nga sakyanan mikalit pag-overtake ug si Retuya nakuratan ug nadam-agan niya si Anor nga nagkugos sa iyang apo.
Ang biktima nga si Cuizon naglakaw lang daplin sa karsada sa Barangay Poblacion, Sibonga diha nga gidam-agan ‘sab sa van nga gimaneho ni Arnaiz De Gracia, 31, taga Barangay Perrelos, Carcar. – /RUB) (BANAT NEWS)
- Latest
