Operator, tripulante wa nipakita

CEBU, Philippines - Wala na igkita sa mga sakop sa Philippine Coast Guard sa Danao City ang operator ug crew sa motorbanca nga natikyaob sa tunga-tunga nga bahin sa Danao ug Camotes alas-2 pasado niadtong Huwebes.

Gipangita karon sila si Eleazar Casas nga giingong operator sa maong motorbanca ug Roque Morre.

Matud pa ni Danao Substation Commander Chief Petty Officer Faustino Pepito Jr. ila giadto ang Brgy. Looc sa maong dakbayan diin maggikan ang motorbanca ug ilang nahibaw-an gikan sa mga silingan nga luwas nga nakauli ang duha kagahapon sayo sa kaadlawon apan nanglakaw ra usab dayon.

Sumala pa ni Pepito gamay nga panagatan ang nalunod ug wa kini pagtugot nga makahatud og pasahero. Nagtuo si Pepito nga nilabyog og hatud sa tulo ka Hapon  kuyog sa tour guide nila nga usa ka Filipina didto sa Camotes ang duha  tungod kay fully- booked man ang barko nga padulong sa Camotes.

Gibutyag ni Pepito nga linaw ang dagat niadtong tungora apan gituohang gamay gyud ang nalunod.

Gipadayag usab ni Pepito nga kanunay gayud sila mopahimangno sa tanan mga tawo sa pantalan, mga trisikad driver ug porter nga dili dad-on ang mga pasahero ngadto sa mga gagmay nga motorbanca kun puno na ang mga barko aron way maaksidente.

Hinuon naluwas  ug gidala sa Ormoc City ang upat nga sila si Keisuke Ichikawa, 31;  Yuta Tamaka, 26; ug Komi Yamauchi ,30; ug ang tour guide nga mihangyong di magpaila. (Rowena D. Capistrano/EIM)(BANAT NEWS)