Nagsuyop, pusher nasikop

CEBU, Philippines - Nadakpan sa kapolisan ang tulo ka tawo nga nagsuyop og shabu sa barangay Pulpogan ug laing usa sa buy-bust operation sa barangay Nangka, Consolacion sa managlahi’ng takna niadto’ng Martes sa gabii.

Si Police Officer 1 Socrates Borinaga sa Consolacion Police Station niila sa usa sa nadakpan nga si Albert Dajao Sasing, 21-anyos, taga Pagsabungan, dakbayan sa Mandaue.

Matud ni Borinaga nga si Senior Inspector Wilson Abot, hepe sa kapolisan sa lungsod, ang nangulo sa operasyon nga niresulta sa pagkasakmit sa pito ka linikit nga pinaugang dahon sa marijuana. Alas 11 pasado sa gabii niadto’ng Martes, ang kapolisan nga gipangulohan ni Abot ang nagpahigayun og checkpoint sa Pulpogan ug nakadawat sila og kasayuran labot sa grupo sa mga lalaki nga nagsuyop og shabu sa usa ka payag sa mao’ng dapit.

Naaktohan ang tulo ka tawo nga nagsuyop og shabu hinungdan nga dali kini’ng gidakop ug naila nga sila si Ruel Buanghug, 36, taga Cambiohan, Casili, Consolacion; Jaime Marababol, 36, taga Tabok, dakbayan sa Mandaue ug Eduardo Manatad, 23, taga Pagsabungan.

Nasakmit nga mga ebidensiya ang 0.15 gramo’ng shabu nga nagkantidad og P600 ug mga drug paraphernalia.

Kaso’ng kalapasan nga pagsuyop og shabu ang ipasaka batok sa mga dinakpan ug kalapasan sa paghupot og ilegal nga drugas. (BANAT NEWS)