Sunog sa Banawa

CEBU, Philippines - Upat ka balay ug usa ka kan-anan ang naugdaw ug tulo ka tawo ang na-suffocate sa aso sa sunog nga miigo sa Sitio Kaimito, Banawa, Barangay Guadalupe ning dakbayan sa Sugbo kagahapon sa hapon.

Ang sunog gialarma sa kabomberohan alas 4:52 sa hapon ug nakontrolar alas 5:10 na sa hapon.

Matud pa ni Cebu City Fire Marshall Rogelio Bongabong Jr., nga nagsugod ang maong sunog sa kusina sa karenderia nga gipanag-iya  ni Noah Verano.             Gumikan kay hinimo sa light materials ang mga balay dali kaayo nga mikatap ang kalayo ug naugdaw ang upat ka balay lakip na ang kan-anan.

Usa ‘sab ka apartment ang partially damage diin tulo sa mga nag-abang sa maong apartment ang gitabang tungod kay naput-an sa aso ug gitagaan og “first aid” sa mga rescuers tungod kay naglisod og ginhawa.

Si Bongabong miingon nga nagpadayon pa ang ilang gihimo nga imbestigasyon kun unsay sinugdanan sa sunog diha sa  maong kan-anan. Nasayran nga dunay nagluto sa maong kusina sa dihang mitumaw ang sunog. Ang maong sunog nagbilin og P200,000 nga danyos. Samtang mokabat sab sa P50,000 ang gibiling danyos human miulbo ang usa ka golf cart nga gi-charge sa sulod sa Cebu Country Club sa Barangay Kasambagan dinhi sa siyudad. Sa imbesti-gasyon ni SFO3 Daniel Relatado sa BFP miingon nga posibleng overcharging o electrical overload ang nahitabo tungod kay karaan na ang mga wires niini. (Jojo C. Ugdol/EIM)(BANAT NEWS)