Daghang napusilan sa Inayawan – CCDRRMC

CEBU, Philippines – Naalarma karon ang Cebu City Disaster Risk Reduction Management Council (CCDRRMC) tungod sa sagunson nga pagpamusil nga nahitabo sa Barangay Inayawan nga miabot og 20 ka insidente gikan sa bulan sa Enero 2014 hangtud sa Marso 1 ning tuiga.

Ang maong mga insidente natala ug giimbestigar na sa Homicide Section sa Cebu City Police Office apan natala usab kini sa Command Control Center (C3).

Si Konsehal David Tumulak, kinsa chairman sa CCDRRMC, miingon nga ang pagpamusil nagsugod niadtong Enero 10, 2014 hangtod sa March 1, 2015. Sigon ni Tumulak nga ang pamilya sa Abangan kinsa usa sa miyembro sa pamilya niini ang nabiktima niadtong Sabado, miduol sa iyang opisina ug nagpatabang aron maangkon ang hustisya.

Matud ni Tumulak nga nabalaka na ang mga residente sa barangay Inayawan tungod sa sunod-sunod nga shooting incidents.

Tungod niini, nagpatawag og meeting si Tumulak sa Inayawan barangay officials, hepe sa Pardo Police Station, Homicide Section sa Cebu City Police Office, ug sa mga pamilya sa mga nabiktima sa pamusil. Tinguha sa maong meeting nga makakita og solusyon ang mga opisyales kun unsaon pag-address sa maong problema. – /EIM) (BANAT NEWS)