Garcia masuspenso 6 ka buwan
CEBU, Philippines - Masuspenso og unom ka buwan si Dumanjug Mayor Nelson Garcia sa kaso’ng grave abuse of authority nga gipasaka ni Bise Mayor Efren Guntrano Gica sa Provincial Board.
Kini ang rekomendasyon sa PB committee on complaints and investigation human sa gipahigayun nga husay sa kaso ug gikatakda nga aprobahan sa hunta probinsiyal karong Lunes.
Matud ni Bise Gob. Agnes Magpale nga dunay mahitabo’ng botasyon sa committee report ni Bokal Arleigh Sitoy, ang chairman sa komitiba.
Mayoriya sa 15 ka sakop sa PB ang kaalyado ni Gica sa Liberal Party samtang upat lang ang kaalyado ni Garcia sa One Cebu Party.
Si Garcia nipasangil nga panimawos ang motibo sa pagpahamtang sa unom ka buwan nga pagkasuspenso ug si Magpale ang nagpaluyo niini. Matud ni Garcia nga daku ang kalagot ni Magpale ngadto sa iya’ng igsuon nga si kanhi gobernador ug karon Kongresista Gwendolyn Garcia gumikan sa bangi sa politika.
Si Mayor Garcia nipasangil nga wala na hatagi og gibug-aton ang iyang depensa sa reklamo ug ang kalagot na ang nipatigbabaw.
“Bisan unsaon niya’g basa di siya katarung og basa kay ang iyang mabasa puro hiwi,” matud ni Garcia.
Moduso si Garcia og motion for reconsideration sa buhatan sa Presidente.
Masaligon si Garcia nga bisan ang igsuon ni Magpale nga si Cabinet Secretary Rene Almendras anaa sa kiliran sa Presidente, matagad ang iyang kaso subay sa balaud.
Si Garcia gireklamo ni Gica nunot sa giingo’ng pagtudlo sa secretary sa Sangguniang Bayan bisan katungod kini sa bise mayor. (Brenda D. Batuto ug Gregg M. Rubio)(BANAT NEWS)
- Latest
