Nipusil sa maestro nadakpan

CEBU, Philippines - Nadakpan na sa kapulisan sa lungsod sa Tabuelan ang estudyante sa high school nga mipusil sa iyang maestro nga nalandig sa tambalanan.

Ang suspetsado nga si Elmer Arcillas, 22,tinun-an sa 4th year nga taga Sitio Guiwanon, Poblacion ang nasikop sa hot pursuit operation sa balay sa iyang uyoan sa Sitio Kabalawan, Barangay Bongon sa maong lungsod.

Si Arcillas maoy gipasanginlang nipusil sa iyang maestro nga si Geronimo Maano Flores, 43, nagtudlo sa Pamplona National High School.

Matud pa ni Police Officer 2 Jerome Millor ang desk officer sa Tabuelan Police nga nahinabi sa Banat News, ang inahan sa batan-on maoy  mitug-an sa kapulisan nga didto kini nitago sa Sitio Kabalawan. Gipangita karon sa mga polis ang armas nga gigamit sa suspetsado apan kini miingon sa mga polis nga iya nang gilabay ang iyang gigamit nga revolver.

Gikatahong nasuko ang suspek sa biktima kay gipatawag ang iyang apohan sa ilang tunghaan gumikan kay magsige kini og absent ug late sa klase. (Jojo C. Ugdol /EIM)(BANAT NEWS)