Asawa’g tanod gilugos

CEBU, Philippines – Usa ka 42-anyos nga asawa nga adunay tulo ka anak gilugos sa drayber og “habal-habal” nga gisakyan niya human sa panag-away niya ug sa iyang bana gikan sila nga nang-disco sa lungsod sa Samboan kaniadto’ng Sabado sa kaadlawon.

Ang biktima nga taga Barangay Cambigong, Samboan naghilak nga misaysay sa kapolisan nga wala gayud siya makasukol kay ang drayber sa habal-habal misukmag kaniya sa kuto-kuto ug dayon giguyod siya pagpugos paingon sa kasagbotan ug didto gipahimudsan.

Sa follow-up operation sa kapolisan, ilang nadakpan si Arnel Rusiana, 24-anyos nga taga Barangay Basak, Samboan apan kusganon kini nga nanghimakak nga gilugos niya ang iyang pasahero.

Si PO2 Ressel Jabagat, desk officer sa Samboan Police Station, mitug-an nga ang biktima asawa og barangay tanod. Gikan sila nga nang-disco sa fiesta sa ilang dapit kaniadto’ng Sabado sa kaadlawon.

Samtang sila naglakaw, nagkalalis ang magtiayon ug misangpot pa sa pagpanapat. Si Rusiana nga nagmaneho sa iyang motorsiklo nahiagi sa magtiayon ug misuway pa gani kini sa pagbadlong.

Ang tanod miawhag ni Rusiana nga dili manghilabot kay asawa niya ang iyang gikaaway. Ang drayber sa “habal-habal” mopadagan na unta apan giingnan siya sa biktima nga mosakay kini ug magpahatud siya sa police station aron isumbong ang iyang bana nga tanod. Matud ni PO2 Jabagat nga saysay sa biktima kanila nga diha’ng nakadagan na sila og kapin sa duha ka kilometro, gihunong ni Rusiana ang motorsiklo sa awaaw nga dapit ug siya gikalitan og sukmag.

Diha nga nabalikan sa panimuot ang biktima wala na siya’y sapot ug gibiyaan na sa suspetsado. Sabado sa hapon na nga misumbong sa kapolisan ang biktima kay matud pa na-trauma kini sa iyang nahiaguman.

Ang bana sa biktima nagpangusmo sa kasuko pagkakita niya ni Rusiana nga diha na sulod sa bilanggoan ug ingon sa kapatyonon og tawo.

“Pwerte’ng isoga sa bana uy, kuwang na lang usapon ang suspek,” matud pa ni PO2 Jabagat nga mitug-an sa Banat News. Apan si Rusiana miingon nga igo ra niya gi-drop sa crossing paingon sa ilang balay ang babaye kay miingon kini nga dili magpahatod sa police station. Matud sa polis nga iyang nakita nga adunay dako nga bun-og sa nawong ug paa ang biktima. Si Rusiana wala’y dautang rekord sa police station ug bisan ang iyang mga kaubang drayber sa habal-habal ingon sa dili makatuo nga kini nanglugos.

Ang biktima kagahapon gidala sa “pink room” sa Vicente Sotto Memorial Medical Center (VSMMC) aron mahiling sa mga doktor.

Karong adlawa hayan pasakaan og kaso nga pagpanglugos si Rusiana. Wala’y piyansa nga gitugot aron makagawas sa bilanggoan ang mga ikiha og rape. – /RUB) (BANAT NEWS)