43 PNP-SAF patay

CEBU, Philippines – Sumala pa sa report sa GMA News.tv,  43 ka polis ang nakalas, onse ang nasamdan ug usa ang na-missing. Ang gubat milanat og onse ka oras, ug mao kini ang labing unang higayon nga napatyan ang SAF og ingon niini kadaghan.

Samtang ang tigpamaba sa regional police nga si Judith Ambong miingon nga 49 ka patay’ng lawas sa mga polis na ang ilang nakuha, apan kagahapon sa hapon gikorihian kini kay nagdoble-doble ang pag-ihap.

Matud pa nga nag-serve og warrant of arrest ang mga sakop sa sa Barangay Tukanalipao, Mamasapano, Maguindanao.

Ang target sa mga awtoridad mao ang Malaysian Jemaah Islamiyah bombmaker nga si Zulkifli bin Hir alias Marwan, nga dunay patong sa ulo sa Amerika nga $5 milyones. Matud pa nga dunay patay’ng lawas nga na-recover nga kaanggid og dagway ni Marwan diha sa encounter site, samtang gituohang nakaikyas si Basit Usman, usa sa mga lider sa BIFF.

Sa report sa 24-Oras sa GMA News kagabii, usa sa mga survivor nga nagranggo og Police Officer 2 ang mibutyag nga gipangtiwasan iyang mga kauban sa mga rebelde pinaagi sa pagpusil sa ilang mga nawong bisan patay na gamit ang ilang kaugalingong mga armas.

Gipanguha usab sa mga rebelde ang ilang mga armas, uniporme ug night-vision goggles. Nasayran nga way sakop sa Armed Forces of the Philippines nga nalambigit sa engkwentro.

Sila si Department of Interior and Local Government Secretary Mar Roxas, Defense Secretary Voltaire Gazmin ug PNP officer-in-charge Deputy Director General Leonardo Espina  mibiyahe na sa Maguindanao.

Tungod sa nahitabo, gikanselar ni Senador Ferdinand “Bongbong” Marcos ang pagtuki sa Bangsamoro Basic Law nga giapas unta nga mapasar sa bulan sa Marso.

Si Mohagher Iqbal , chief negotiator sa MILF malaumong dili maapektahan ang peacetalks ug magpadayon gihapon kini. Gibasol niya ang PNP-SAF kun nganong wala sila mo-coordinate sa MILF nga duna silay dakpon sa maong dapit nga unta ilaha man kini nga teritoryo. "Sila ang pumasok.

Pumasok tapos umaatake, anong gagawin mo?...Self-defense ang nangyari," matud pang Iqbal kinsa midugang nga ang mahinungdanon nga dili ang MILF maoy nanguna sa kagubot.

Si Cebu Archbishop Jose Palma mipadayag sa iyang  kasubo  tungod sa  daghang kinabuhi nga nakalas.

“This is unfortunate because any encounter, anything that involves causes death to our brothers, this is really a sad incident,” matud ni Archbishop Palma.

Samtang si Sr. Supt. Clifford Gairanod, Battalion Commander sa Regional Public Safety Battalion sa rehiyon mibutyag sa Banat News nga pipila sa mga napatay nga opisyal iyahang mga kaila ug higala sa dihang nadestino pa kini sa Basilan.

Matud niya nga ilaha pang gisusi kun dunay mga Cebuano nga SAF nga naapil sa maong engkwentro. Wires (BANAT NEWS)