Mga libud-suroy target sa mga badlungon

CEBU, Philippines -  Dunay grupo sa mga badlungon nga mamiktima’g mga libud-suroy sa dakbayan sa Sugbo ang gitutokan sa kapolisan nunot sa duha ka insidente sa pagpamusil sa nangaging mga adlaw.

Niadtong miaging gabii, usa ka libud-suroy ug gituohang adunay deperensya sa pangisip ang naangol human gipusil samtang kini nahinanok og katulog sa eskina sa mga dalan Osmeña Blvd. ug Manalili St., Barangay Sto. Niño, dakbayan sa Sugbo.

Ang biktima nailhan lang sa pangan nga "Reynel" kinsa kanunay rang matulog sa aseras sa mga kadalanan sa Sugbo.

Matud ni Senior Police Officer 4 Alex Dacua, imbestigador sa Homicide Section sa Cebu City Police Office nga gidiretso pagpusil ang biktima samtang natulog ug naigo sa iyang aping ug tuong kamot. Ang mga nirespondeng sakop sa Emergency Rescue Unit Foundation (ERUF) midala sa biktima sa tambalanan.

Sigon pa ni SPO4 Dacua nga dunay mga nakakita sa krimen apan walay buot mokooperar kanila tungod sa kahadlok.

Matud pa ni Dacua nga duha na ka kaso ang iyang nakuptan nga iyang naobserbahan nga parehas og estilo. Dugang pa niya nga aduna'y grupo sa mga nanginabuhi sa ilegal nga paagi diha sa kadalanan nga iyang gidudahang nagpaluyo niini nga ang modus magsige og pangayo og kwarta sa mga libud-suroy ug makililimos. Kadtong dili mohatag ilahang pamusilon. (BANAT NEWS)