Nag-jogging, negosyante gitulis

CEBU, Philippines -  Gitionan og armas ang usa ka 57-anyos nga lalaki samtang nag-jogging sa grotto sa Luray Uno, Poblacion, dakbayan sa Toledo.

Usa ka Eddie Cuales ang nitaho sa Toledo City Police Station human siya nakalingkawas sa duha ka wala mailhing tawo dihang nikagar ang armas nga gition kaniya.

Matud sa biktima nga samtang siya nag-jogging, kalit siya gihunongan sa duha nga sakay sa motorsiklo ug nag-helmet. Usa kanila ang nibunot sa wala matino nga kalibre sa armas dayon gition sa biktima ug gisuwayan sa pagpabuto apan suwerte kay nikagar.

Tungod sa kalisang, daling nakadagan ang biktima ug nakapangayo og tabang sa mga residente duol sa maong dapit.

Nagtuo ang kapolisan nga posibleng tulis ang tumong sa duha ka tawo.

Samtang nahugno ang kalibutan sa usa ka mangomprahay nga nagdala og P110,000 nga inutang pa dihang gitulis sa niaging hapon sa barangay Langub, lungsod sa Argao. Ang biktima naila nga si Gary Sarda, 31, taga Tubod, lungsod sa Sibonga nga mamalitay og hayopan.

Matud ni Police Officer 3 Benjamin Gerosaga nga gikan pa nanghuwam ang biktima og kwarta sa usa ka magpapatigayun sa Lindogon, Sibonga.

Samtang si Sarda naghugas sa iyang motorsiklo pasado alas 10 sa buntag niadtong Biyernes, usa ka lalaki nga nagtaptap sa iyang nawong ang mition kaniya og armas. Nimando ang tulisan nga ihatag sa biktima ang iyang bag diin sulod ang iyang kwarta.

Tungod sa kahadlok sa biktima nga patyon siya sa tulisan, iya gihatag ang bag. Daling nisibat ang suspek nga nagdagan ug igo na lang nipahibawo sa kapolisan sa lungsod sa Argao ang biktima.

Ang kwarta nga nadala sa tulisan igbabayad unta sa biktima ngadto sa nagpahuwam niya sa kwarta.  (BANAT NEWS)