Rama salig gihapon ni Poblete, De Los Santos
CEBU, Philippines - Dako gihapon ang pagsalig ni Cebu City Mayor Michael Rama nilang Engineer Jose Poblete pangulo sa Office of the Building Officials ug Konsehal Mary Ann De los Santos kabahin sa isyu sa scraps sa giguba nga Cebu City Medical Center.
Gihagit miaging adlaw ni De los Santos ang usa ka kolumnista nga miingon nga dunay mga opisyal sa siyudad nga nakasapi sa mga scraps sa CCMC.
Matud pa sa kolumnista, nakadawat og P2.5 milyones ang opisyal aron ang maong kompanya sa Manila maoy mo-demolish sa CCMC. Giklaro ni Poblete nga naay kompleto nga imbentaryo ang maong mga scraps ug sa ilang pagsusi di na mapuslan ang scraps niini.
Wala hinuon mahimuot si Rama kun nganong gikwestyon ang demolisyon sa CCMC tungod kay di kini iyang orihinal nga ideya.
Matud ni Rama nga nakadawat siya og tawag gikan ni Interior Secretary Mar Roxas nga pabalhinon ang mga pasyente sa mas luwas nga lugar tungod sa pagpasad sa mga pasyenti gawas sa edipisyo dihang gitay-og sa 7.2 magnitude nga linog ang Kabisay-an ug gideklarar ang CCMC building nga peligro na.
Way pagsupak ang mayor kung dunay imbestigasyon nga himuon bahin niini subay sa awhag ni Konsehal Sisinio Andales ngadto sa Office of the Ombudsman. (Khacel Anne Diel Sanchez/EIM)(BANAT NEWS)
- Latest
