Bata nalumos sa lim-aw

CEBU, Philippines - Patay na nga napalgan ang usa ka tuig pa nga batang lalaki nga naglutaw sa kinawtan nga bahin sa Barangay Poblacion sa lungsod sa Aloguinsan.

Ang biktima naila nga si Kent Narvasa kapin pa sa tuig ang edad, molupyo sa Barangay Poblacion sa lungsod sa Asturias.

Si Police Officer 2 Recelieto Kilaton, desk officer, nga nahinabi sa Banat News miingon nga ang nalumos kuyog sa iyang inahan nga si Evelyn Narvasa, 27,  nga naninda sa maong lungsod tungod sa kapistahan niini.

Matud pa ni Kilaton nga wala nakabantay ang inahan sa bata kun mikamang ba kini ug nilakaw sanglit na-busy siya sa mga mipalit sa iyang baligya. Napalgan na lang nga wala nay kinabuhi ang iyang anak sa lim-aw dili halayo sa iyang pwesto.

“Ang bata naghinay-hinay practice og lakaw, wa mabantayi sa inahan naa nay stall, naninda ni sila. Basin sa kadaghan sa namalit wa na kaalinggat sa iyang anak, didto na nabantayan wa nay kinabuhi ang bata sa lim-aw,” dugang ni Kilaton.

Matud pa ni Kilaton nga ang maong lugar mapundohan og tubig kun mag-uwan mao nga giabunohan kini og anapog apan dunay pipila ka bahin niini nga dili maayo ang pagkapatag ug napundohan og tubig. Didto nalumos ang bata.

Gidala unta sa Pinamungajan District Hospital ang maong bata apan gideklarar na kini sa doctor nga dead on arrival. Way nakit-ang timailhan sa foul play ang doktor sa kamatayon sa maong bata nga gihulagway nga pagkalumos ang gikamatyan niini.  (BANAT NEWS)