Polis gipatay

CEBU, Philippines – Dead on the spot ang usa ka polis nga nadestino sa Minglanilla Police Station human kini gipusil sa usa ka wa mailhing lalaki kagahapon sa hapon diha sa usa ka tigbakayan sa Upper Lipata, Minglanilla.

Ang biktima naila nga si Police Officer 2 Omar Parages, nadestino sa Police Community Relations (PCR) sa kapulisan sa Minglanilla ug nagpuyo sa Poblacion Ward 2, Minglanilla.

Human sa pagpamusil gikuha pa sa gunman ang dala nga sling bag sa biktima nga dunay sulod nga iyang service firearm.

Ang asawa sa biktima nga si Arlene mitug-an nga wala siya’y nahibaw-ang dunay kontra ang iyang bana. Base sa nakuha nga impormasyon sa Banat News gikan sa mga nagpuyo sa mao’ng lugar nga matag adlaw nga Domingo dunay tigbakayan sa maong lugar.Usa usab ka impormante ang mitug-an sa Banat News nga atol unta pagbuhi sa manok sa dihang gipusil si Parages ug giusban pa kini og pusil sa dihang natumba.

Si Dennis usa sa mga nagpuyo sa lugar nga nagpanday sa taas sa iyang balay ang nakakita sa tulo ka mga lalaki lakip na sa gunman nga nagdala sa sling bag ni Parages dihang miagi kini sa iyang tungod human sa pagpamusil.

Dugang pa ni Dennis nga ang igsuon sa namatay nga polis nga usa ‘sab ka polis nga nadestino sa Boljoon nga si Police Officer 1 Niño Parages ang dali pa unta nga miresponde sa lugar ug  nasugatan pa ang mga gunman ug gipangutana kung naa bay gipusil sa sulod.

“Ang gunman pa g’yud ang napangutana niya, mitubag pud ang gunman nga, Oo naa sa sulod,” dugang pa ni Dennis kinsa miingon nga wala dayon siya nakatug-an sa igsuon sa biktima nga mao kadto ang gunman tungod sa iyang kahadlok.

Gitug-an sab ni Dennis nga kadto pa ‘sab kini nakakita sa panagway sa tulo ka mga lalaki nga miadto sa ilang lugar.

Matud pa sa hepe sa kapulisan sa Minglanilla nga si Senior Inspector Richard Gadingan nga nahinabi sa Banat News,  igo lang miagi sa maong lugar ang biktima kauban ang iyang gamay nga anak nga babaye dihang kalit kini nga gipusil sa wala pa mailhing gunman.

Sigun pa ni Gadingan nga base sa nakuha nilang pasiunang impormasyon nga posibling tulo ka tawo ang mihimo sa pagpatay sa maong polis apan usa lang ang mipusil. Gihulagway ni Gadingan nga usa ka tarong nga pagkapolis si Parages.

Si Senior Police Officer 1 Florante Capangpangan sa Minglanilla Police mihulagway nga usa ka tarong nga pulis si Parages ug niadtong Biyernes nagpasiaw pa kini kanila.

Kapin pa lang usa ka tuig nga nadestino si Parages sa mao’ng lugar gikan sa Dumanjug Police Station.  Sigun pa sa mga sakop sa Scene of the Crime Operatives (SOCO) nga kadaghanan sa ulo ang igo ug duna ‘sab sa lawas ug gituohang rebolber ang gigamit sa gunman.

Hangtud karon nagpadayon pa ang imbestigayon sa kapulisan aron pagtumbok sa motibo sa mga mamumuno.  – /EIM) (BANAT NEWS)