Buhatan og armas gironda

CEBU, Philippines - Nasakmit sa kapulisan ang daghang mga armas sa Danao City niadtong Miyerkules sa hapon atol sa usa ka raid nga gihimo sa mga operatiba sa Criminal Investigation and Detection Group (CIDG-7).

Ang maong operasyon gihimo sa CIDG human sila nakadawat og impormasyon may kalabutan sa tighimo og armas sa barangay Suba, Danao City nga si Jover Manipis Enriquez.

Si CIDG-7 regional chief, Senior Superintendent Ritchie Posadas miporma og usa ka grupo nga gipangulohan sa iyang deputy chief nga sa Superintendent Fermin Armendarez III aron muhimo sa maong operasyon.

Ang grupo ni Armendarez ang dali sab nga miadto sa Rizal Street, barangay Suba ug ilang nakita si Enriquez sa usa ka payag nga naghimo og mga armas.

Dali gilayon nga gihamagan sa mga operatiba ang maong payag ug wala na ‘sab nakasibat pa si Enriquez ug kini naaresto.

Nakuha sa payag ang usa ka .45 pistol, lima ka wala pa nahuman nga .45 pistols, usa ka KG9 machines pistols, wala pa mahuman nga .38 revolvers, lima ka .22 revolver nga wala pa mahuman, nagkadaiyang mga magazines ug mga gamit sa paghimo og armas. 

Sigun pa ni Armendarez nga ang maong mga armas ang gibana-bana nga duna kini kantidad nga P150, 000. Sa nakuha nga impormasyon sa mga operatiba nga paingon unta ang mga armas sa Mindanao.

Samtang sa pamahayag sa dinakpan sa mga tigbalita kini mibutyag nga igo lang kini gisugo nga muhimo sa maong mga armas apan  wala kini motug-an kung kinsa man ang misugo niini.

Matud pa ni Enriquez nga   nagsilbing “runner” lang siya sa maong negosyo gumikan sa kawad-on. (BANAT NEWS)