Gipatay sa anak sa kapuyo

CEBU, Philippines – Patay ang usa ka 53-anyos nga lalaki human gidunggab sa 23-anyos nga anak sa iyang live-in partner sa sitio Panaghiusa, Tunghaan, Minglanilla pasado alas 9 sa gabii niadtong Domingo.

Ang biktima naila nga si Danilo Pardillo samtang ang suspek naila nga si Dennis Lipreso, ulitawo, usa ka construction worker nga pareho nga nagpuyo sa maong lugar. Sa imbestigasyon sa kapolisan nasayran nga pulos hubog ang biktima ug ang suspek dihang nahitabo ang insidente.

Gikompronta ni Pardillo si Lipreso kun nganong dili mamahin sa iyang sweldo sa iyang inahan ug nahitabo ang init nga tinubagay ug sinukmagay.

Wala kabantay ang biktima nga duna diay dala nga kutsilyo ang suspek ug kini gihansakan igo dapit sa ilokan nga mao’y hinungdan sa diha-diha nga kamatayun. Dali sab nga nakasibat ang suspek palayo sa maong lugar.

Ang igsoon ug pamilya sa namatay ang mibisita na sab sa buhatan sa kapolisan ug gikatahong desidido gyud nga mopasaka og kaso batok sa suspek. -/GMR) (BANAT NEWS)