Baha, alimpus miigo sa CV

CEBU, Philippines - Daghang mga dapit sa dakbayan sa Sugbo, Mandaue ug Talisay nalunopan kagahapon sa buntag diha nga mibunok ang kusog kaayo’ng ulan nga dala sa tropical depression nga Mario gikan pa sa kaadlawon. 

Si Mayor Michael Rama mideklarar nga walay klase sa tanang level sa mga public ug private schools sa dakbayan sa Sugbo. Ang sama nga deklarasyon gisunod usab sa ubang mga mayor sa mga dakbayan sa Metro Cebu.

Gimando usab ni Gobernador Hilario Davide III ang pagkanselar sa klase sa tanang tunghaan sa mga dapit sa probinsya sa Sugbo aron ang mga tinun-an dili mahasol pag-adto  sa mga tunghaan.

Sa samang higayon, si Lapu-Lapu City Mayor Paz Radaza ug Mandaue City Mayor Jonas Cortes misuspenso usab sa klase sa tanang school levels tungod sa kakusog sa uwan ug namugnang pagbaha sa kadalanan.

Heavy rainfall

Si Leonardo Samar, sa Philippine Atmospheric Geophysical and Astronomical Service Administration (Pagasa)-Mactan nagkanayon nga nagsugod ang pagbunok sa ulan alas-2 sa kaadlawon hangtud sa alas-7 sa buntag kagahapon nga nasinati sa Central Visayas, Samar Provinces ug Eastern Visayas.

Sumala pa ni Samar sa interbyu sa dyLA kagahapon,  miabot og 55.2 millimeter ang gikusgon sa uwan sud sa lima ka oras ug makonsiderar na kini nga “heavy rainfall.” 

Matud pa niya, ang maong mga rehiyon nasakop sa ulan nga dinala sa bagyong Mario nga anaa sa habig sa Pasipiko.

Cebu City

Daghang mga kawani sa lainlaing call centers sa IT Park ang wala dayon makapauli human sa ilang mga duty kay wala nay mga sakyanan nga mibiyahe tungod sa kahadlok sa baha nga miigo sa lainlaing karsada sa dakbayan.

Mga tawo nga nagpuyo kilid sa Kinalumsan River unahan sa CIT University sa Natalio Bacalso Avenue wala mamiya sa ilang panimalay hangtod nga si Mayor Rama migamit og megaphone pag-awhag kanila nga biyaan ang ilang balay kay misuyla na ang tubig sa tampi.

Didto sa Barangay Buot, bukirang bahin sa dakbayan sa Sugbo, usa ka balay ang naguba diha nga naligiran kini’g dako’ng bato samtang ang tag-iya nga si Fructuoso Bacayan ug ang iyang pamilya paingon na unta nga mokaon kagahapon sa buntag.

Mandaue , Lapulapu

Sa dakbayan sa Mandaue, taga tuhod usab ang giladmon sa tubig sa Barangay Subangdaku tungod sa pag-awas sa Mahiga Creek ingon man gisanapan usab sa tubig ang ubay-ubay pa nga mga dapit sa Mandaue.

Si Felix Kid Suico ang city disaster officer sa Mandaue nga nahinabi sa Banat News nagkanayon nga gibahaan usab ang dalan A.S. Fortuna sa Barangay Banilad, Barangay Tipolo, Barangay Guizo, Barangay Mantuyong, Barangay Looc, Basak ug  Barangay Paknaan.

Samtang sa Lapu-Lapu City, gimandoan ni Radaza si Edwardo T. Ompad,City Schools Division Superintendent nga dili magklase ang tanang public ug private school levels. Si Andy Berame, deputy officer sa  City Disaster Management Office nagkanayon nga base sa nakuha nilang impormasyon gikan sa Pagasa way senyales nga mag-landfall ang bagyong Mario.

Gipabakwit

Samtang sa Bogo City, gibahaan usab ang Barangay Taytayan, Bungtod, Anonang, Malingin ug Cayang tungod gihapon sa pagbunok sa uwan.

Dul-an usa ka libo ka mga molupyo sa nahisgutang mga barangay ang gipabakwit  ug gipahiluna sa ilang mga multi-purpose halls.

Alimpus miigo

Upat ka mga barangay sa Borbon ang naigo sa usa ka alimpus nga gilangkuban sa Antigua, Cadarohan, Poblacion ug Tongi. Wa hinuoy mga kadaot nga gibilin ang maong alimpus.

Samtang sa Cebu City, pito ka mga classroom sa Southwestern University sa Barangay Sambag Dos ang nangalangkat human naigo sa usa ka alimpus atol sab sa pagbundak sa kusog nga ulan kagahapon.

Hinoon wala’y gika-report nga naangol sa hitabo ug wala sa’y lain nga na danyos sa mga silingan nga establisemento.

Red alert

Si Police Regional Office director Chief Superintendent Prudencio Tom Bañas miisa sa red alert status sa rehiyon ug gi-activate ang ilang Oplan Saklolo tungod sa kadautan sa panahon ug gimandoan ang mga Search and Rescue (SAR) Team sa kapulisan.

Samtang ang Central Command mipadagan sab sa ilang mga sakyanan aron paghakot sa mga na- stranded nga mga pasahero tungod sa baha.(Rene U. Borromeo, Jojo C. Ugdol, Romeo Limpangog, Christell Fatima M. Tudtud/EIM)