Pinoy UN Peacekeepers nakaeskapo
CEBU, Philippines- Nakaeskapo ang kapin 70 ka mga Filipino United Nations Peacekeepers gikan sa duha nila ka mga kampo sa Golan Height nga gialirongan ug giatake sa gatosan ka mga Syrian rebels ug teroristang Nusra Front sa miaging gabii.
Sumala pa pito ka oras nga nakigkombate pagdepensa sa ilang mga kampo ang 40 ka mga sundalong Filipino nga napiit sa Rwihana. Matud pa nga gatosan ka mga rebelde ang mialirong sa ilang kampo.
Ang mga rebelde migamit og mortar ug gibalik-balikan og dasmag og mga trak ang gate sa kampo sa mga Filipino. Dunay mga okasyon nga ang Syrian Army migamit og mortar aron tabangan ang mga Filipino sa matag atake sa mga rebelde.
"Although they were surrounded and outnumbered, they held their ground for seven hours," sumala pa ni Gen. Gregorio Pio Catapang, ang Chief of Staff sa Armed Forces of the Philippines.
"We commend our soldiers for exhibiting resolve even while under heavy fire," dugang pa niya sa report sa Philstar.Com.
Unang nakaeskapo nianang Sabado sa gabii ang 35 ka Filipino peacekeepers sa Breiqa ug na-rescue sa kaubang Filipino ug Irish peacekeepers.
Una niini, nailog sa mga rebeldeng Syrians ug Nusra Front nga konektado sa al Qaeda terror group ang Quneitra crossing nga maoy utlanan sa Syria ug Israel ug gi-hostage ang 44 ka mga Fijian UN Peacekeepers.
Luwas nga nakagawas sa Rwihana ang tropa human sa duha ka oras nilang paglakaw sa mga bungtod dihang gipaubos sa ceasefire ang lugar. (BANAT NEWS)
- Latest
