Kandidato sa Mr. Universe nadakpan

CEBU, Philippines - Nasikop sa mga operatiba sa City Intelligence Branch (CIB) sa Cebu City Police Office (CCPO) ang kanhi contestant sa Mr. Universe Philippines kinsa gikatahapan nga usa na ka bigtime drug pusher sa sitio Upper Torre, Inayawan niadtong Martes sa gabii.

Ang dinakpan naila nga si Heracleo Berdin, 32, alyas Rocky o Gio, ulitawo, nga nagpuyo sa maong lugar.

Gihulagway ni Supt. Romeo Santander, hepe sa CIB, nga matawag na gyud nga drug lord si Berdin nga naglihok sa dakbayan sa Sugbo ug silingang probinsiya.

Matud ni Santander nga dugay na nga gipanid-an sa kapolisan si Berdin kinsa giingong mao’y tigmando sa mga tawo niini kung asa ipanghulog ang drugas.

Sa gihimong buy- bust operation, giingong nakabantay si Berdin hinungdan nga dali kini nga milayat agi sa bintana gikan sa ika-duha nga andana ug dayon sutoy og dagan.

Hinoon abtik nakagukod ang kapolisan ug ilang nagunitan si Berdin.

Nakuha sa kapolisan gikan sa balay ni Berdin ang 905 ka linukot nga marijuana, usa ka medium size ug 31 ka gagmay nga pakete sa gituohang shabu nga duna’y kantidad nga P20 mil.

Gawas kang Berdin, sikop usab ang tulo ka lalaki nga nagpuyo sa ubos sa iyang panimalay nga naaktohan nga nagduwa og video karera nga sila si Mamerto Abellana, Pablito Rafols ug Jonathan Layaguin.

Samtang ang kapolisan sa Pardo Police Station misikop usab sa usa ka level 3 drug pusher sa sitio Upper Suran, Kinasang-an sayo kagahapon sa buntag.

Ang dinakpan naila nga si Jonathan Baclayon, 37, pinasikad sa search warrant nga gi-isyu ni Judge Soliver Peras.

Atol sa ronda, ang inahan sa suspetsado ang miatubang sa kapolisan ug miingon nga wala ang iyang anak.

Apan ang mga silingan sa suspek mitug-an sa kapolisan nga naa ra sulod ang suspek hinungdan nga ila kining gisulod ug nasakpan sulod sa usa ka lawak si Baclayon nga nagkurog sa kahadlok.

Nakuha sa kapolisan ang duha ka medium size nga drugas nga dunay kantidad nga dili momenos P50 mil. (BANAT NEWS)