Barangay nga kuyaw sa landslide ug baha
CEBU, Philippines - Ang mga opisyal sa dakbayan sa Sugbo gitug-anan kagahapon sa kadagkoan sa Department of Environment and Natural Resources (DENR) sa mga dapit nga risgo kaayo sa pagdahili sa yuta ingon man baha.
Matud ni Eddie Llamedo, tigpamaba sa DENR nga adunay 71 ka sitio dinhi sa dakbayan nga “high risk” sa dahili sa yuta ug 26 ka laing sitio ang “moderate risk” ug unom ang kritikal sa kabarangayan sa dakbayan sa Sugbo.
Kabahin sa baha 76 ka sitio dinhi sa dakbayan ang ubos sa high risk ug 92 ang giisip nga “moderate” base sa geo-hazard mapping sa Mines and Geosciences Bureau (MGB) sa tuig 2010.
Giawhag ni Llamedo ang mga opisyal sa dakbayan nga hatagan og igo nga pagpakabana ang mao nga mga dapit sama sa pagbutang og mga slope protection aron dili dali nga modahili ang yuta. Ang mga konsehal sa dakbayan sa Sugbo maoy miawhag sa kadagkoan sa DENR nga tug-anan sila kon asa nga mga dapit dinhi sa dakbayan ang peligro aron makahimo sila og pagpangandam.
Ang Local Disaster Risk Reduction Management Office maoy gitahasan sa pagpangita’g sulbad sa problema. (BANAT NEWS)
- Latest