Truck natagak sa pang-pang, nagsakay angol
CEBU, Philippines- Nagbitay sa kahoy ang usa ka 10-wheeler cargo truck human nahagbong sa pangpang sa may kurbadahong bahin sa Palingpaling, Obo, Dalaguete alas tres sa hapon niadtong Lunes.
Kini ang gihulagway ni PO2 Christopher Romarate, desk officer sa Dalaguete Police Station.
Giila ang drayber nga si Ervin Ramirez, 47, taga Abog, Pamplona, Negros Oriental ug ang kauban mao si Jimmy Duran, 43, taga Poblacion 8, Tanjay, Negros Oriental, mga trabahante isip sub-contractor sa CEBECO 1.
Gikan sa Samboan ang cargo truck ug padulong sa Dalaguete dihang nawad-an og control ang drayber dayon bangga sa railings kilid sa karsada ug nahulog sa pangpang. Kapin sa 40-metros ang nahulgan sa truck diin kini nasangit sa kahoy apan gibana-banang sobra pa sa 100-metros ang gilawmon padulong sa mga bato sa sapa.
Gihulagway ni Romarate nga hilan ang maong lugar nga labing lawom nga pangpang sa lungsod.
Daling giluwas sa mga residente ang mga biktima ug dali nga gidala sa tambalanan sa dakbayan sa Sugbo. Dugang ni Romarate nga kung wala pa nasangit sa kahoy ang maong truck segurado gyud nga masinsiyo ug wala’y mabuhi sa duha ka sakay. - /GMR) (BANAT NEWS)
- Latest
