Polis na-entrap sa NBI

CEBU, Philippines- Usa ka pulis ang gisikop sa National Bureau of Investigation(NBI-7) human gireklamo nga nangilkil sa kaipon sa usa nila ka dinakpan kagahapon sa hapon diha sa Plaza Independencia siyudad sa Sugbo.

Ang gisikop giila nga si PO2 Joselito Las Piñas, 54, residente sa siyudad sa Talisay ug nadestino sa beat patrol sa Waterfront Police Station.

Matud sa reklamante nga si Michael Detuya, 31, molupyo sa Barangay Labangon ning siyudad nga ang iyang kaipon nga si Jennifer Lantaka usa ka tindera sa usa ka mall sa downtown area ug upat ka tuig na nga nagtrabaho sa maong tindahan gipadakop sa iyang amo nga Insik niadtong adlaw’ng Sabado human gipasanginlang nangawat.

Gibutyag ni Detuya nga kagahapon sa ala-una sa kaadlawon giingong nag-abot sila ni Las Piñas ug gihisgutan sa duha ang pagkasikop sa kapuyo niini apan wala direkta nga misulti ang pulis nga aregluhon ang kaso apan base sa gipamulong ni PO2 Las Piñas ang pagsabot si Detuya nga i-settle na lang ang kaso.

Miasoy usab si Detuya nga si Las Piñas miingon   kaniya nga siya lang ang bahala kun pila ang ihatag apan nagkasabot nga P3 mil ang ihatag sa pulis bugti sa pag-areglo sa kaso sa iyang kapuyo.

Kagahapon nasabutan ni Detuya ug Las Piñas nga ihatag ang kwarta apan sa wala pa makigtagbo ang reklamante midangop kini sa NBI-7 ug mireklamo ug giplano dayon sa awtoridad ang entrapment operation batok ni PO2 Las Piñas.

Si Detuya mibutyag nga maong midangop siya sa NBI-7 kay nasayod kini nga sayop ang gihimo sa pulis. Suway unta nga gikuhaan og pamahayag si PO2 Las Piñas apan nagdumili una kini sa pagkomento.

Samtang ang Regional Director sa NBI-7 Atty. Max Salvador miingon nga dili nila konsentihon ang maong binuhatan.

Sa iyang bahin, naglagot nga na-surpresa ang hepe sa Waterfront Police Station nga si Senior Inspector Wayne Magbanua dihang gikuhaan og habig sa Banat News kabahin sa pagkasikop sa iyang sakop.

Gibutyag niya nga gipahibalo siya sa NBI nga dunay entrapment operation nga himuon sa iyang area apan wala siya masayod nga iyang sakop diay maoy dakpunon.

“Wala ko nagto-o nga akong tawo, ang sabi lang nila mayroon daw silang entrapment sa area. Kung tinuod, sus, dili g’yud na nato i-dugay, lisod kaayo na klase nga polis og totoo (tinuod) na nga allegation,” dugang pamahayag ni Magbanua. - /EIM) (BANAT NEWS)