9-anyos naghikog

CEBU, Philippines - Dili makatoo ang inahan sa usa ka 9-anyos  nga batang babaye nga patay na nga iyang maabtan ang iyang anak nga naghikot og pisi sa iyang liog nga gituhoan nga naghikog, pasado alas 11 sa buntag sa nakalabay nga adlaw sa Barangay Poblacion, Tabuelan.

Ang bata nga usa ka grade 3 pupil nagtungha sa Tabuelan Elementary School. Matud pa ni PO1 Ver Hortelano sa Tabuelan Police Station nga nahinabi sa Banat News nga pasado alas-8 sa buntag milakaw ang inahan kay miapil sa programa sa DSWD nga manglimpyo sa kalsada.

Nakurat na lang ang inahan sa iyang pag-uli nga naabtan niyang nagluhod ang anak ug duna’y pisi sa liog niini, patay na kini pag-abot sa Tuburan District Hospital. Naglibog ang inahan unsay rason nga nabuhat kadto sa iyang anak kay buotan man nga bata ang iyang anak.

Si PO1 Hortelano miingon nga ilaha karong gipaabot ang resulta sa autopsy aron pagsubay kung wala ba’y foul play sa kamatayon niini, ilaha usab gisumitir nga ebidensya ang underwear sa bata. Nagduda ang kapulisan nga gibinuangan ang bata ug maulaw motug-an sa iyang inahan. “Posible nga naa’y nagbinuang niya. Iya lang gitago unya nakahunahuna og hikog,” matud pa ni PO1 Hortelano. (/EIM)(BANAT NEWS)