P1.5M shabu, 38 gambling machines nasakmit sa CCPO-CIB
CEBU, Philippines - Usa ka saturation drive batok sa ilegal nga drugas ug ilegal nga sugal ang gilusad sa kapulisan sa City Intelligence Branch (CIB) sa Cebu City Police Office (CCPO) sa tulo ka mga barangay dinhi sa dakbayan sa Sugbo sa miaging gabii.
Ang kapolisan nakasakmit og mga shabu nga nagkantidad og gibanabanang P1.5 milyon ug 38 ka mga video karera ug moli-moli gikan sa Barangay Ermita, Pasil ug Calamba.
Sa Barangay Calamba nasikop sa kapulisan ang usa sa mga notadong tigpayuhot og ilegal nga drugas nga si Richard Nabua, 55.
Matud pa ni Superintendent Romeo Santander ang hepe sa City Intelligence Branch dili lang ilegal nga drugas ang target karon sa kapulisan sa Sugbo kay apilon nila hasta ilegal nga sugal.
Sa laing bahin, nadakpan sa buy-bust operation sa kapolisan sa Cordova si Robert Ain Dico Ventura diha sa panimalay niini sa Barangay Day-as kagahapon sa kaadlawon. Nasakmit kaniya ang 99 ka paketeng shabu ug drug paraphernalia. (BANAT NEWS)
- Latest
