Soc nangayo’g katin-awan sa suspension

CEBU, Philippines - Nangayo og katin-awan sa buhatan sa Ombudsman si kanhi Talisay City mayor, Konsehal Socrates Fernandez, kung mapahamtangan pa ba siya sa silot nga pagkasuspenso.

Atol sa regular session sa konseho kagahapon, si Fernandez mipadangat og privilege speech diin matud niya nga ang desisyon sa Ombudsman dili pa final.

Sa iyang motion for reconsideration, si Fernandez nangayo og katin-awan sa mando nga pagsuspenso sanglit ang kaso nahitabo sa kanhi pa niyang posisyon.

Subay sa Aguinaldo Doctrine, dili na masilotan ang usa ka opisyal nga gikiha og administratiba kung masublian sa eleksiyon o kaha mapili sa laing posisyon. Niadtong Marso 14, 2014, si Ombudsman Conchita Carpio-Morales miaproba sa tulo ka buwan nga pagpasuspenso kang Fernandez human namatud-an  nga nakahimo og simple neglect of duty. Ang Department of Interior and Local Government (DILG) ang gimandoan sa pag-implementar sa suspension order. (Brenda D. Batuto/GMR)

Kapolisan nanglimpyo sa suba

Gilimpyohan sa kapolisan sa San Nicolas ug Carbon Police Stations inabagan sa mga residente ug mga opisyales sa barangay Ermita, Pasil, Pahina San Nicolas ug Pahina Central ang Guadalupe River, dakbayan sa Sugbo.

Ang pagpanglimpyo gihimo tumong sa pagpahibawo sa katawhan nga nagpuyo dapit sa kasapaan labot sa problema sa basura ug wala’y insaktong waste disposal ug ang mga sakit nga pwedeng makuha niini.

Lakip sa tinguha mao nga ma-edukar ang katawhan labot sa pagpataka og labay sa basura nga makaapekto sa panglawas sa katawhan ug sa komunidad.

Nakuha ang 200 ka sakong basura nga dali usab nga gi-dispose.  - /GMR) (BANAT NEWS)