Hepe sa TEAM gustong ipataktak, mga traffic enforcers “mangilkilay”
CEBU, Philippines- Ang pagpalagpot kang Edwin Ermac isip operation chief sa Traffic Enforcement Agency of Mandaue (TEAM) lakip na ang gialigar nga pagpanguwarta sa mga traffic enforcers maoy gipangayo sa mga sakop sa Pinagkaisang Tsuper at Operator’s Nationwide (PISTON) Cebu sa protest rally atubangan sa City Hall kagahapon sa buntag.
Si Greg Perez nga maoy pangulo sa maong kahugpongan sa mga drayber miingon nga ilang gireklamo ang kanunay nga pag-usab-usab ni Ermac sa mga rota ug ang naghinobra niini ka-estrikto.
Dugang alegasyon ni Perez nga adunay mga traffic enforcers nga manguwarta nga modawat lang og P20 ngadto nilang mga drayber nga madakpan.
Apan kini gipanghimakak ni Ermac, matud niya andam siyang mobiya sa katungdanan kun wala na siya kinahanglana.
Giawhag usab sa grupo ang konseho sa dakbayan sa Mandaue nga mopasar og resolusyon aron suportahan ang demanda sa mga driver nga ihunong kining panguwarta ug dili pangdisiplina nga polisiya sa Department of Transportation and Communication (DOTC) pinaagi sa Joint Administrative Order 2014-01 ug Department Order 2008-39. Giawhag usab nila ni Perez si Mayor Jonas Cortes pagbutang og klarong loading ug unloading areas ug kinahanglang naa ang mga drayber alang sa konsultasyon.
Ang legal officer sa dakbayan nga si Atty. James Abadia ug Konsehal Elstone Dabon nga maoy chairman sa committee on transportation midawat sa maong sulat nga gipadangat nila ni Perez.
Si Abadia miingon nga ilang ipadangat ngadto sa mga sakop sa traffic board sa dakbayan ang mga reklamo nila ni Perez dungan sa pag-awhag sa mga drayber nga ilhon kinsa ang mga traffic enforcers nga mangilkilay.
Samtang si Konsehal Dabon miingon nga iyang gisanong ang demanda nila ni Perez pinaagi sa pagpasiugda og public hearing labot sa kontrobersiyal nga JAO 2014-01 nga giawhag sa PISTON ang hingpit gayod nga pagbasura. - /EIM) (BANAT NEWS)
- Latest
