P1 Milyon gigahin pagpananom og bakhaw

CEBU, Philippines - Ang kagamhanan sa dakbayan sa Sugbo mipagahin og P1 ka milyon aron gastohon pagpananom og mangroves sama sa bakhaw ug ubang kahoy-kahoy bisan nga ang dakbayan walay baybayon nga katamnan.

Si Konsehal Nida Cabrera, pangulo sa Committee on Environment, maoy misugyot nga gahinan og usa ka milyon ka pesos ang mao nga gastohan.

Dunay ubang mga konsehal sa dakbayan nga mikwestyon niini nga sugyot kay nasayod sila nga walay baybayon ang dakbayan nga matamnan niini nga mga mangroves. Gibutyag ni Cabrera nga ang Bantay Dagat Commission misugod na gani sa pagpananom og mga bakhaw didto sa kabaybayonan sa Tongo Island unahan nga bahin sa “Shell Island” nga sakop na sa Cordova.

Daghang mga konsehal sa dakbayan nga wala masayod nga ang Tongo dili na sakop sa dakbayan sa Sugbo apan sakop na kini sa lungsod sa Cordova.

Apan si Bantay Dagat Executive Director Ranulfo Sebusa mipasabot nga ang kabahin sa Tongo Islands ilang tamnan og mga bakhaw kay makatabang kini nga mapugngan ang mga dagko nga bawod nga mohapak sa dakbayan.

Ang kwarta nga gamiton sa mao nga kantidad adto ibanon sa Pagcor Funds.  (BANAT NEWS)