HPG-7 cops gibalhin sa Crame

CEBU, Philippines -  Girelibohan sa ilang katungdanan ang upat ka polis lakip na ang tulo ka opisyal sa Highway Patrol Group 7 nga nalambigit sa kamatayon ni Atty. Noel Archival ug kaubanan.

Ang girelibohan mao sila si  Sr. Supt. Romualdo Iglesia, Chief Insp. Eduardo Mara, Sr. Insp. Joselito Lerion ug si SPO4 Edwin Galan.

 Si Sr. Insp. Oliver Plania, tigpamaba sa HPG-7 miingon nga ang ilang buhatan sa kaulohan gyud mismo ang miluwat sa maong suspension order nga naa nahimutang sa Camp Crame.

Ang maong order giluwatan niadtong Abril 16 ug giimplimentar kini dayon sugod sa maong adlaw matud pa ni Plania.

Si Plania nagkanayon nga adto sa ulohang buhatan madestino ang maong mga opisyal ngadto sa Personnel Holding and Administrative Services (PHAS).

Dugang ni Plania nga adto sa lamang sila ibutang aron sab mawagtang ang kabalaka sa kadaghanan nga ilang ma-impluwensyahan ang kaso nga gipasaka batok kanila. Sukad niadtong Abril 16, si Supt. Rommel Ochave nga gikan sa Intelligence Division sa HPG Camp Crame na ang bag-ong Regional Chief sa HPG-7 hulip ni Iglesia. Si Chief Insp. Mara nga nahinabi sa mga tigbalita kagahapon miingon nga motuman sila sa relieve order ug molarga siya sa Manila sa labing dali nga panahon.

Sumala pa niya nga maayo na lang pud nga mabalhin siya sa Manila tungod kay mihangyo sab sila sa korte nga usbon ang venue sa hearing sa ilang kaso kung mapasakaan na gyud sila og kaso sa hukmanan. Dugang ni Mara nga floating status silang upat karon ni Iglesia, Lerion ug Galan ug adto una sila sa kaulohan.

Si Plania miingon nga bisan pa man mabakante ang posisyon ni Mara ug ni Lerion dili kini makaapektar sa serbisyo sa HPG-7. Magpadayon gihapon sila sa pag-alagad sa katawhan ug sa pagbuhat sa ilang mandato sa HPG.

Miingon si Plania nga padayon gihapon nilang buhaton ang motorcycle riding course ilabi na nga usa kini sa mga pagpangandam alang sa Asia Pacific Economic Cooperation Summit sa sunod tuig dinhi sa Sugbo.  (BANAT NEWS)