Gipareglaha'g dunggab kritikal

CEBU, Philippines - Kritikal ang kahimtang sa usa ka tawo human pareglahi og dunggab sa wala hiilhing kriminal didto sa dalan Tupas, barangay Suba, dakbayan sa Danao sa miaging Domingo sa gabii.

Ang biktima mao si Raymundo Ramonida, 28,   minyo, nga nagpuyo sa maong dapit. Si SPO1 Ildefonso Prosia sa kapolisan sa maong dakbayan nga nahinabi sa Banat News miingon nga nag-inusara nga naglakaw ang biktima gikan sa Fine Tree Mall sa barangay Poblacion sa maong dakbayan.

Dihang pag-abot niini sa maong lugar kalit lang nga gidunggab makatulo ka higayon ang buko-buko niini sa kriminal nga nagsunod kaniya.

Human malukapa sa yuta ang biktima misibat usab dayon ang kriminal ug ang biktima nga nakapangayo og panabang, gisakwat sa iyang mga kabanay ug gihatod dayon ngadto sa Danao Provincial Hospital apan   gibalhin usab kini ngadto sa Vicente Sotto Memorial Medical Center sa dakbayan sa Sugbo.

Si SPO1 Prosia miingon nga wala’y kaaway ang biktima sa ilang dapit busa nagtuo sila nga gipareglahan lang ang biktima. (/WC) (BANATNEWS)