2026 Regional Science, Technology, and Innovation Week gibuksan

CEBU, Philippines — Gibuksan sa Department of Science and Technology (DOST) ang 2026 Regional Science, Technology, and Innovation Week (RSTW) sa Central Visayas kagahapon, Hulyo 13, sa Waterfront Cebu City Hotel.

Gipakita ang nagkalainlaing teknolohiya nga gitumong sa pagpalambo sa serbisyo publiko, pagsuporta sa mga negosyo, pagpasiugda sa malungtarong kalamboan, ug paglig-on sa pagpangandam batok sa mga kalamidad.   

Ang kalihukan gipangulohan ni DOST Secretary Renato U. Solidum Jr. uban ni Undersecretary for Regional Operations Sancho A. Mabborang ug Assistant Secretary for Countryside Development Maria Teresa B. De Guzman.

Mitambong usab sila Cebu Governor Pamela Baricuatro ug Mandaue City Mayor Thadeo Jovito “Jonkie” Ouano.

Ang tulo ka adlaw nga kalihokan, nga molungtad hangtod Hulyo 15, naglakip og mga diskusyon bahin sa artificial intelligence (AI), malungtarong enerhiya, technology transfer, mga startup, pagpalambo sa micro, small and medium enterprises (MSMEs), ug mga industriya sa umaabot.

Usa sa mga nag-unang gituki mao ang responsableng paggamit sa AI ug gipadayag sa DOST ang potensyal niini sa pagpaayo sa serbisyo sa gobyerno, operasyon sa negosyo, edukasyon, agrikultura, ug panglawas, samtang gisiguro usab ang etikal nga paggamit, pagpanalipod sa pribasiya sa datos, ug padayon nga pagdumala sa tawo.

Gipasalig ni Governor Pamela Baricuatro ang padayon nga suporta sa Gobyerno sa Lalawigan sa Sugbo sa mga programa sa DOST-7, nga nag-ingon nga ang pagpamuhunan sa siyensya, teknolohiya ug inobasyon maoy yawe aron mahimong mas kompetitibo ug mas lig-on ang lalawigan.   

Matud pa ni Baricuatro, magpadayon ang lalawigan sa pagsuporta sa mga inisyatibo sa DOST nga nagpalig-on sa food security, malungtarong enerhiya, inobasyon, ug mas lig-on nga mga komunidad.

Gilusad usab sa DOST ang DRONE Central Visayas Industry Development Action Plan ug gipresentar ang Smart and Sustainable Communities Program sa Mandaue City, diin adunay na 124 ka local government units (LGUs) sa tibuok nasud nga miapil.

Matud ni Solidum, duha ang prayoridad sa DOST alang sa drone technology, mao ang paghimo og mga drone nga gidesinyo ug gihimo sa mga Pilipino ug ang pagpalapad sa paggamit niini sa nagkalainlaing sektor.

Bisan wala pay kompanyang mipasalig sa dakoang produksyon sa mga drone ubos sa programa, giingon ni Solidum nga nakahatag na ang DOST og mga grant ngadto sa pipila ka unibersidad aron makahimo og drone technologies.

Midugang siya nga ang DOST mismo nakahimo na og nagkalainlaing drone prototypes, lakip ang gaan nga styrofoam drones nga gidisenyo aron makapaminos sa kadaot kon aksidenteng mahulog.

Sa Central Visayas, matud ni DOST-7 Regional Director Tristan Abando nga siyam ka pilot LGUs sa Sugbo ug Bohol ang karon nag-apil sa programa. (BANAT NEWS)