Opisyales sa Cebu City, probinsiya nitambong sa concert sa BINI

CEBU, Philippines — Gibana-banang niabot ngadto sa 12,000 ka indibidwal ang nitambong sa labing unang konsyerto diha sa SM Seaside Cebu Arena nga gipangulohan sa sikat nga P-Pop nga BINI niadtong Hulyo 11, 2026.

Kini ang gipahibalo ni Cebu City Mayor Nestor Archival, Sr. kinsa nitambong kauban si Konsehal Nice Archival ug mga kabanay niini.

Nasigpatan nga naglingaw-lingaw sa maong konsyerto sila si Gobernador Pamela Baricuatro, kanhi Cebu City mayor Michael Rama ug ang anak niini nga si Konsehal Mikel Rama ug Konsehal David “Dave” Tumulak kinsa usa sa nagtutok sa siguridad sulod sa arena.

Mapasalamaton si Archival sa tanang ahensiya sa gobiyerno, pribadong sektor, ug sa mga Sugboanon nga nitabang aron mahimong malinawon, organisado, ug malamposon ang labing unang konsyerto diha sa SM Seaside Cebu Arena.

Matud sa mayor nga ang maong konsyerto usa ka makasaysayanong panghitabo sa Dakbayan sa Sugbo ug nagpakita nga andam ang siyudad sa pagdawat ug pagdumala sa dagkong kalihokan sa umaabot.

Base sa assessment sa Traffic Management Center (TMC) nga gipangulohan ni Traffic Operations Officer Pastor “Jong-Jong” Alcover II nga epektibo ang kompleto ug pagbutang og traffic advisories ug mga traffic sign sukad niadtong Huwebes ug nagpakatap og traffic enforcers ug adunay hapsay nga oras sa pagrelibo sa pagbantay sa dagan sa trapiko.

Adunay igo nga siguridad gikan sa SM Seaside, Arena, ug ABS-CBN samtang dili dili kaayo huot ang dagan sa trapiko ang nasinati diha sa Vestil Road ug Cebu South Coastal Road (CSCR) gawas sa oras sa paggawas sa concertgoers.

Gikataho nga igo ang parking area alang sa mga pribadong sakyanan, maayo ang pagdumala sa dagan sa mga tawo, ilabina sa bridge way ug sa paggawas sa arena human sa konsyerto.

Pipila sa mga manan-away ang nipadayag pinaagi sa ilang social media nga dali lang sila nakauli sa ilang mga tagsa-tagsa ka mga panimalay gumikan kay adunay nakaandam nga mga CiBus nga mohatud gikan sa SM Arena paingon sa IT Park ug daghan usab ang nidayeg nga dili huot ang dagan sa trapiko sa wala pa nagsugod ug pagkahuman sa kalihokan.

Ang maong kalihokan natapos sa wala pa ang alas 9:30 sa gabii ug ang pagpanggawas sa mga sakyanan nahuman sulod sa alas 10:30 sa gabii.

Gitapos usab ang Traffic Management Plan ug ang temporaryong truck ban sa lugar sa wala pa ang alas 11:00 sa gabii. BDB BANAT NEWS