Sara kurog sa impeachment
Sulod sa kapin sa duha ka buwan, sa susamang gidugayon sa pagyaka sa mga kongresista sa impeachment complaints batok niya, si Bise Presidente Sara Duterte nipatuo sa tibuok nasud nga iyang gihangop ang pagpasaka sa mga kaso ug andam na siyang motubag sa mga pasangil.
Pero dili diay. Bakak diay sama sa nangagi niyang mga pangangkon. Wala diay mahinangop sa impeachment proceedings. Dili diay tinuod nga andam nga moatubang sa mga nipasangil nga iyang gibolsa ang confidential funds sa Office of the Vice President (OVP) ug Department of Education (DepEd).
-o0o-
Gideklarar ni Duterte ang iyang kahinangop sa impeachment niadtong Disyembre. Pila ka adlaw human napasaka ang una ug ikaduhang kaso ug pila ka adlaw sa wala pa ipasaka ang ikatulo.
Nipadayag og kalipay nga makapahuway nang iyang mga sinaligan sa OVP ug DepEd gikan sa iyang gipasangil nga panghasi nga imbestigasyon sa mga sakop sa House Committee on Good Government. Kay nagtuo nga sa public hearings sa House ug sa mosunod nga impeachment trial sa Senado siya na lang maoy sukitsukiton sa iyang mga transaksiyon sa 2022 ug 2023.
-o0o-
Gisubli pagpasalig ang kaandam sa impeachment sa iyang press conference niadtong Pebrero 7, duha ka adlaw human napasaka ang articles of impeachment sa Senado:
• Gitun-an na sa iyang mga abogado ang mga pasangil batok niya human unang naghisgot si Kongresista France Castro og impeachment niadtong Nobiyembre 2023; maong nakumbinser siya pila ka adlaw na lang sa wala pang Valentine’s Day nga
• Mas sakit pang buwagan og uyab kay sa ma-impeached sa House.
-o0o-
Nabisto nga paukyab ra diay ang tanang gipasalig nga kaandam ug takoban ra diay ang tanang gipakita nga kakalma ug kamasaligon niadtong Martes. Dihang iyang mga dumadapig sa Davao City ni-petisyon sa Korte Suprema aron ipahunong ang impeachment proceedings:
• Kon tinuod pang dul-an sa duha ka tuig nang nangandam, sila untay mo-apura, dili mopahunong, sa impeachment trial nga gipamugos ni Senate President Chiz Escudero nga unya pa sa Hulyo sugdan; ug
• Labihan gyod tingaling sakita sa impeachment, nga mahimong motaktak niya sa puwesto ug modili niya pagdagan sa 2028, kay wala pa man tay nadunggan nga gibuwagan og uyab nga nagpalaban sa Korte Suprema.
- Latest
