Di diay super ang app
Gi-download nako ang eGovPH super app. Nga gipasalig nga maoy plataporma sa tanang online services sa mga ahensiya sa nasudnong gobyerno ug local government units. Nahugno dayon ko.
Nipasalig man gud si Secretary Ivan John Uy sa Department of Information and Communications Technology (DICT), nga tinuod nga IT expert ug posibleng nakahibawo sa iyang gipanulti, nga mahimo nang mas sayon ang mga transaksiyon sa gobyerno. Pero ang kalisod sa pagsugod paggamit sa app, di maayo nga timaan. Sa kalidad sa kasinatian sa mga magbubuhis sa digitalization sa burukrasya.
***
Hapsay ang unang mga lakang sa pagparehistro sa eGovPH: Gipangayoan ko og mobile number; gi-text dayon ang unom ka numero nga OTP (one-time password); gawas sa pagpasuwat sa personal nga mga detalye, nitanyag sa pag-scan sa QR code sa akong Philsys (Philippine Identification System) ID; human na-scan, nigawas ang akong ngan, kinahanglang i-manomano og puno ang email ug physical address; gipahibawo dayon nga rehistrado na.
Sa di pang kaabli sa buttons sa mga serbisyo sa nasudnon ug lokal nga mga ahensiya, suguon ka sa pagpaubos sa verification. Dinhi nagsugod ang akong problema.
***
Human sa live selfie (palingion ka sa tuo ug wala ug papilukon sa mga mata), giingnan ko sa app nga pakyas ang eKYC (electronic know your customer) verification. Dihang gi-click ang verification link sa email nga gipadala, giingnan kong “Page not found”.
Nibalik ko sa app nga nitanyag pag-scan sa akong Philsys ID. Human nadawat ang scan sa ID, ang app niingon nga gi-review ang akong account ug pahuwaton og email o text message.
***
Human sa pila ka oras nga paghuwat, giablihan nako og balik ang eGovPH super app. Gipangayoan ko og balik sa personal nga mga detalye. Gisugo na sab sa pag-live selfie. Nitanyag pag-scan sa akong Philsys ID. Dihang nadawat nang scan, gisukmatan ko nga nasumiter nang ID.
Pasayloa nga nag-apura. Maghuwat diay tingali ko hangtod sa pag-abli sa mga upisina sa DICT sa Lunes. Aron masubli sa ilang mga kawani ang akong account. Una ko makasugod sa paggamit. Kay wa man diay trabaho ang gobyerno sa weekend. Nalipat lang ko. Kay ginganlan man gud nila og super app.
- Latest
