Tungod ba kaha sa kataas sa iyang ranggo sa resulta sa eleksyon niadtong Mayo, si Senador Robin Padilla nakalimot o nisukwahi g’yud sa tambag nga gibilin ni kanhi Senate minority leader Franklin Drilon sa bag-ong mga magbabalaod: Pagtuon sa mga hisgutanan sa kada sesyon; ayaw una pagsalida; ug paabot sa imong turno.
Si Padilla wa magpaabot sa iyang turno. Nidemanda ug gihatagan sa liderato sa Senado, nga nisalikway sa tradisyon sa pagmatngon, sa chairmanships sa importanteng mga komitiba. Ug, kon basehan ang gidaghanon sa mga pangutana nga nasupalpal, wa magtuon.
***
Wa siyay bilib sa mga nag-una niya nga nidangop sa pagpakahilom pagtabon sa ilang kakuwang sa pangandam ug katakos:
- Si Senador Lito Lapid nihukas sa tanang pagpaka aron ingon nga bida sa mga sesyon;
- Si Senador Bong Revilla nisuway og memorya og mga linya pero nakaamgo nga di maapas sa script writer pag-andam og mga tubag sa di mahibaw-ang mga pangutana sa iyang kaubanan atol sa interpellation; ug bisan
- Si kanhi presidente Rodrigo Duterte nipili pagtak-om ug pagligoy dihang nilingkod sa House of Representatives isip representante sa Davao City.
***
Di si Padilla ang unang nagkabulingit sa Senado:
- Si Senador Bong Go napugwat nga ang iyang kasuod sa Malacañang wa makasagang sa kauwawan sa pataka niyang istorya ug kapakyas pagtubag sa mga pangutana gikan sa mga beterano sama ni Drilon;
- Si Senador Bato dela Rosa nisipsip na lang ni Drilon aron di tiwasan ang iyang kataphaw; ug
- Si Senador Francis Tolentino, wa mahinog sa pagkapandol niyang Drilon sa niaging administrasyon, nanlipaghong na sab karong bag-o ni Senador Risa Hontiveros.
***
Di unta makabatyag si Padilla nga wa siya respetohi sa opisyal sa Department of Foreign Affairs (DFA) kon:
- May nakagiya pa niya nga kon nagpaabot siya og mas isog kay sa diplomatikanhon nga pagpanalipod sa Mutual Defense Treaty ug sa arbitral ruling sa West Philippine Sea, ang Department of National Defense ug Armed Forces of the Philippines unta ang iyang gipangutana; ug
- May nakahunghong pa lang nga iyang fan si DFA Undersecretary Eduardo Jose de Vega, di unta siya magtuo nga ang pagsumay-sumay sa iyang mga linya sa pelikula maoy pahinumdom sa iyang kabarumbado.