Di overpriced ug di outdated
Ang napalit sa akong asawa nga unang henerasyon sa iPad niadtong 2010 buhi pa. Bisan wa na niya lingia, kay nadani sa bag-ong mga bersiyon, gisigehan nako og gamit. Kada tuig magkamenos na hinuon ang iyang kapuslanan.
Kay hagbay ra man nga gihunongan og suporta sa Apple, nagkanihit ang apps nga ma-install. Pila ka tuig ang nilabay, di na magamit ang YouTube. Nisunod og kamatay human sa pila ka buwan ang Kindle. Way lalis nga outdated na. Pero pasaligan nako ang DepEd, PS-DBM, ug COA nga di overpriced.
***
Kay nikaging na man sab ang built-in browser nga Safari, nisuway ko og download (kay magamit pang App Store) sa ubang browsers. Na-install nako ang karaang mga bersiyon sa Dolphin ug Opera.
Maong nakatan-aw ko og balik sa YouTube pinaagi na lang sa iyang website. Pero nilungtad ra og pila ka buwan. Unang nibalibad ang Opera. Sunod nga nisurender ang Dolphin. Makaabli pa sa YouTube pero di na kaabli og bisan unsang video. Nakumbinser kong hapit na g’yud matigbak kay di nang kapalihok bisan sa karaan nakong duwa sa PvZ.
***
Pero nakakita gihapon ko og lusot. Gibalhin ang audio ug video files sa akong Android phone pinaagi sa VLC media player ug napahimuslan ang dakong bakanteng memory sa karaang iPad. Pero nagsige og hunong ang playback.
Gipahimungtan na lang og balhin ang akong e-books kay maabli pa man sa karaan nga iBooks app. Pero puwerteng bug-ata. Lisod basahon kon maghigda. Mas sayon basahon ang paperback bisan maglingkod.
***
Giingnan ko nga mahimong gamiton nga CCTV. O digital photo frame. Pero wa koy planong mangespiya sa akong pinuy-anan. Wa say interes pagtutok sa karaang mga letrato. Pero ganahang maminaw sa Beatles.
Akong gibalhin ang .MP3 files sa tanang Beatles CD nga hinatag sa akong maguwang. Gipun-an sa mga kanta, dihang nagbuwag na, nilang John Lennon, Paul McCartney, George Harrison, ug Ringo Starr. Ug kinakusgang covers. Giipon og playlist ang kaliboan ka kanta ug gipatokar nga gi-shuffle ug gi-loop. Way hunong ang tokar sa akong paboritong suok sa tibuok adlaw ug gabii. Payter ang baterya. Kausa ra mag-charge kada semana. Mas mapuslanon kay sa laptops sa DepEd ug PS-DBM.
- Latest
