Di mabasol
Di mabasol si Presidente Duterte kon nakumbinser nga iyang mahudlat ang Senado. Kay sa una niyang pasidaan og constitutional crisis sa Enero ning tuiga, dihang imbestigahon untang ilegal nga pagpamakuna sa Presidential Security Group (PSG) sa kolorum pang bakuna sa Sinopharm sa China, namilok ang mga senador.
Gawas nga wa ipatawag sa Senado ang kadagkoan sa PSG, nga gidid-an sa presidente sa pag-atubang sa bisan unsang imbestigasyon, wa na ipadayon sa mga senador ang ilang pakisusi sa labing bantang nga timaan sa ka way klaro sa mga lagda sa pagpamakuna.
* * *
Di makapausab sa hunahuna sa presidente nga kagawongan niya ang Senado sa kahilom sa mayoriya sa mga senador sa pinatuyangan niyang panginsulto, pagbinastos, ug panghudlat batok ni Senador Richard Gordon ug ubang mga sakop sa Senate Blue Ribbon Committee nga niapil sa imbestigasyon sa mga transaksiyon sa Pharmally Pharmaceutical Corp.
Gawas nilang Senate Minority Leader Franklin Drilon ug ubang sakop sa oposisyon, way laing senador nga nangahas sa pagpanalipod ni Gordon --kinsa nipakita og talagsaong kaisog sa pagsukol ug pag-insistir nga magpadayon ang imbestigasyon-- sa hapit adlaw-adlaw nga atake sa presidente.
* * *
Samot kamasaligon ang presidente nga moduko ang mga senador sa iyang bugalbugal kay nikakak dayong liderato human gidid-an ang mga sakop sa gabinete pagtambong sa umaabot nga mga imbestigasyon ug ang Philippine National Police (PNP) ug Armed Forces of the Philippines (AFP) pagdakop sa mga saksi nga i-contempt sa Senado.
Ang pasalig ni Senate President Vicente Sotto nga di ipadakop ang mga sakop sa gabinete ug taphawng mga tubag ni Senador Panfilo Lacson sa presidente di makapapas sa pagduda sa pangangkon nga ang ilang tandem independente sa Malakanyang.
* * *
May timaan hinuon nga nagduda pa si Presidente Duterte kon motila ba gihapon ang mayoriya sa mga senador sa iyang lapalapa: Wa pa niya mapalagpot si Gordon isip pangu sa Senate Blue Ribbon Committee. Sukwahi sa kasayon sa iyang mga alyado paghukas ni Senador Leila de Lima sa iyang komitiba niadtong Septiyembre 2016.
Sa iyang kamat-an sa politika, nga di mahitabong retirohan niya, nanagana ang presidente. Nga maapiki kon mas sayo nga makiggubat niya ang mga alyado. Nga mawani sa di tinagoan niyang paugat pagpabilin sa gahom.
- Latest
![](https://www.philstar.com/images/stand-in-photo-male.jpg)
![](https://www.philstar.com/images/stand-in-photo-male.jpg)