Nagpabilin ang Dakbayan sa Sugbo nga maoy sentro sa pagsulbong pagbalik sa mga kaso sa COVID-19 sa Central Visayas, pasabot nga siya gihapon ang kinadaghanan og bag-o nga kaso sa tibuok rehiyon. Samtang makapakugang ang pagdaghan sa bag-ong mga kaso sa Negros Oriental.
Apan ang konsuylo mao nga igo ang gidaghanon sa swab tests nga gipahigayon. Sa ato pa, bisan sa pagsulbong sa bag-ong mga kaso, dako ang kahigayonan nga matultolan, mabuwag ug matambalan dayon ang mga masakiton ug ang ilang close contacts sa di pa makapanakod sa mas daghan.
* * *
Sa niaging semana, Enero 10 (Dominggo) hangtod sa Enero 16 (Sabado), nakaangkon ang tibuok rehiyon og 1,056 ka bag-ong kaso. Ang labing daghan naggikan sa tulo ka dapit: 318 (30%) sa Dakbayan sa Sugbo, 207 (19.6%) sa Lalawigan sa Sugbo, ug 142 (13.4%) sa Negros Oriental.
Samtang di kakumpiyansahan, di makapaalarma ang gidaghanon sa bag-ong mga kaso sa ubang bahin sa rehiyon: Dakbayan sa Mandaue may 57 (4.8%), Dakbayan sa Lapu-Lapu may 39 (3.7%), Bohol may 4 (0.38%), ug Siquijor may 2 (0.19%).
* * *
Ang makapadasig nga mga numero nga among nasubli sa niaging semana mao ang igo nga gidaghanon sa swab tests, daghang salamat sa 13 na ka molecular laboratories sa rehiyon: Unom sa Dakbayan sa Sugbo, duha sa Dakbayan sa Mandaue, duha sa Dakbayan sa Lapu-Lapu, duha sa Bohol, ug usa sa Negros Oriental.
Ang pagsulbong sa bag-ong mga kaso sa Negros Oriental mahimong nanukad sa pagsugod na sa Negros Oriental Provincial Hospital sa paghimo sa ilang kaugalingon nga swab tests.
* * *
Ang lapad nga swab testing di hinuon paigo. Kinahanglan nga dasonan sa agresibo nga contact tracing aron matultolan ang tanang nakaduol ug posible nga natakdan sa mga pasyente. Ug palambuon ang katakos sa mga tambalanan ug isolation centers pagtambal ug pagbuwag nila gikan sa ubang mga molupyo.
Bisan nahibalik nang Dakbayan sa Sugbo sa inadlawng listahan sa topnotchers sa Department of Health (DOH), wa kinahanglana ang pagtak-op sa mga utlanan ug paghigpit sa mga patigayon ug panginabuhi. Angayng pahinumdoman ang lokal nga mga opisyal nga ang pagpatuman sa minimum health protocols di mahimo sa sulti lang.