Nauwahi ang Russia sa ubang kanasuran sa pagpahigayon og clinical trials sa ilang giangkon nga labing unang bakuna batok sa COVID-19. Nagsugod ug natapos ang Phase 1 (pagbakuna og 38 ka tawo) niadtong Hunyo ug nagsugod ug natapos ang Phase 2 (pagbakuna og 76 ka sundawo) niadtong Hulyo.
Nag-una og tulo ka buwan ang clinical trials sa upat ka kandidatong bakuna sa China, Britanya, ug Estados Unidos kay nagsugod niadto pang Marso. Apan ang maniobra sa kadagkoan sa Russia aron pagtino nga sila ang unang makamugna og bakuna nahitabo niadtong Abril.
***
Nidalidali pagpasar og balaod ang duha ka bay balaoranan sa Russia --ang State Duma (lower house) ug Federation Council (upper house)-- niadtong Abril nga nipapas sa panginahanglan sa Phase 3 sa paghatag og lisensiya sa mga bakuna.
Ang bag-ong balaod maoy gipasikaran ni Russia President Vladimir Putin sa iyang pangangkon niadtong Martes nga may bakuna na sila batok sa COVID-19, bisan mao pay pagsugod sa Phase 3 sa ilang clinical trials nga naglakip lang og 2,000 ka tawo sa Saudi Arabia, United Arab Emirates (UAE), Brazil, ug Mexico.
***
Kon sama pa ka-iresponsable ni Putin ang ubang mga pangu, mas una pa untang mangangkon og bakuna silang:
- Primero Ministro Boris Johnson sa Britanya kay nagsugod ang Phase 3 sa AstraZeneca ug University of Oxford niadtong Hunyo;
- Presidente Donald Trump sa Estados Unidos kay nagsugod ang Phase 3 sa duha ka managlahing bakuna sa Moderna ug Pfizer niadtong Hulyo; ug
Presidente Xi Jinping sa China kay nagsugod ang Phase 3 sa duha ka bakuna sa Sinopharm ug ikatulong bakuna sa Sinovac niadtong Hulyo.
***
Sukwahi sa pangangkon ni Putin, di Russia ang may unang bakuna batok sa COVID-19. Naunhan siya sa People’s Liberation Army (PLA) sa China. Nga nitugot sa bakuna sa CanSino Biologics ug Academy of Military Medical Sciences niadto pang Hunyo 25, kapin sa duha ka buwan sa wa pang deklarasyon ni Putin.
Sa ato pa, kon puhalay maoy hisgutan, ikaduha lang si Putin sa PLA. Apan angay tang kuyawan. Kalibogan nang daan ang kampanya batok sa COVID-19, mas gubot pa g’yud kon mga politiko ug mga sundawo nay mopahibawo nga duna silay tambal.