Niabot og kapin sa 18,000 ang naalagaran sa Grand Halad sa Kapamilya niadtong Sabado kay may service providers nga naabtan og gabii tungod sa kadaghan sa katawhan. Pasado alas-7 sa gabii nang nahuman ang libreng kapon, purga ug bakuna sa mga iro ug iring nga gipangulohan ni Cebu City Veterinarian, Dr. Alice Utlang.
Matod ni Utlang napugos sila paghunong human nakakapon og 324 ug nakaatiman og laing kapin sa libo kay gikapoy na pag-ayo. Naalagaran hastang mga molupyo sa lagyong kalungsoran, hangtod sa Argao sa habagatan, Moalboal sa kasadpan ug Carmen sa amihanan.
***
Giunsa namo pag-ihap ang mga nakapahimus sa labing dakong piyesta sa libreng mga pangalagad? Si Sid Pacifico, tagduma sa seguridad sa Grand Halad, nidestino og mga kadete nga nagda og head counters sa duha ka ganghaan sa CTU Main Campus.
Nakaihap sila og kapin sa 16,000 sa main gate sa M.J. Cuenco ug kapin sa 2,000 sa back gate sa R. Palma. Dayong udtong tutok, ang mga naglinya sa main gate niabot atbang sa Plaza Independencia.
***
Mao ning ihap sa mga nakapahimus sa libreng mga pangalagad: Konsulta sa mga doktor ug tambal, 3,023; laboratory services, 2,619; ibot, pasta ug limpiyo sa ngipon, 934; hiling sa mata ug antipara, 806; tupi, masahe, manicure, ug pedicure, 1,288; pag-ayo sa cellphones, tablets, laptops, ug desktops, 202;
Konsulta sa abogado ug notaryo, 222; kapon, purga, ug bakuna sa mga hayop, 1,418; lugaw ug noodles, 10,230; pagkaon, duwaan ug unlan sa Bantay Bata 163, 4,702; ubang gipanghatag, 2,050; MOR t-shirt printing, 600; juice, libro ug lapis sa ABS-CBN TV Production, 2,200; ug CTU PESO Job Fair, 67.
***
Nakatabon sa mga nanambong sa Grand Halad gikan sa init ang mga toldang gipahuwaman sa mga opisyal sa Cebu City, Consolacion, Naga City, ug ABS-CBNMobile. Nanghakot sa mga sangkap sa Grand Halad ang mga trak nilang San Nicolas, Cebu City Councilor Clifford Niñal, ug sa General Services Office sa Cebu City Hall.
Ug nanglimpiyo sa tibuok venue human sa Grand Halad ang Department of Public Services nga gipangulohan ni kanhi Cebu City Councilor Bob Cabarrubias.