Paugat, papating, ug pabaga

Paugat, papating, ug pabaga: Human sa usa ka tuig ug tulo ka buwan sa pagbanos ni Presidente Rodrigo Duterte sa Malakanyang, nga napuno sa daghan uyamot nga mga eskandalo ug pakauwaw sa panglaktod sa balaod ug pangabuso sa gahom, nabantang nga mao’y duwa sa iyang pamunoan.

Ang 16 milyones ka boto ni Duterte sa niaging piniliay (sa way paghisgot nga 38% ra sa rehistradong mga botante) ug ang 6 milyones ka boto niyang labaw ni Mar Roxas giisip nga lisensiya sa paghimo og mapangahason nga pasundayag sa, nakatag-an ka, paugat, papating, ug pabaga.

* * *

Paugat, papating ug pabaga ang gisalimbong ni Duterte sa iyang kapakyas pagtuman sa saad sa kampanya pagsulbad sa ilegal nga drugas sud lang sa tulo ka buwan. Kay unsa pa man tuod ang mahimo sa mga botante? Nidaog na siya. Gawas pa, way laing nagbandilyo sa plataporma sa drugas.

Wa siyay panagana pagdeklarar sa Pilipinas nga narco state ug pagkumpisal nga di masulbad ang drugas hangtod sa pagtapos sa iyang termino tungod sa, nakatag-an ka, paugat, papating, ug pabaga.

* * *

Paugat, papating, ug pabaga ang nakaaghat sa pamunoang Duterte sa pag-imbento og bank accounts ug ubang peke nga mga dokumento ug paghulga pagpasaka og bisan unsa na lang nga mga kaso batok sa ilang mga kaatbang sa politika.

Bahala na kon wa silay ebidensiya (kay atubangan sa impeachment cases batok nilang Bise Presidente Leni Robredo ug Ombudsman Conchita Carpio Morales, kinsa may piskal o huwes nga mangahas pagbarug batok nila) kay kumbinsido nga moabiba gihapon ang kinabag-an sa katawhan ang ilang paugat, papating, ug pabaga.

* * *

Ang paugat, papating, ug pabaga sa pamunoang Duterte nihimong mas yano sa ilang pagduma sa nasud: Di na sila managana sa pagpamakak ug pagpanghulga, di na gani kinahanglan nga mangayo og pasaylo kon masakpan ang ilang mga bakak ug kon mohungaw ang ilang mga pasidaan, kay ang pipila nga mobuyag nila manghilom ra.

Apan nahibalik ang budget sa Commission on Human Rights tungod sa protesta, di lang sa mga kaatbang kon dili hasta na sa mga dumadapig ni Duterte, sa social media. Mao’ng mas daghan ang nagmartsa sa kadalanan gahapon sa pamasin sa mas dagkong kadaogan nga ilang makab-ot.