Dili katuohan. Usa ka tag-iya'g gagmay'ng tindahan nga ang baligya mga cellphone accessories, sama sa cellphone casing ingon man cellphone repair shop, apan mideklarar og kita nga labaw pa sa gideklarar sa Banco de Oro-Magallanes Branch.
Saludo gyud ko ni Rohanie D. Asal, usa ni ka Muslim nga ang gamay kaayong tindahan, lima ka metro-kuwadrado ra ang gidak-on, ug anaa sa eskina Legaspi ug Colon, mideklarar og kita nga P1.2 million sa tuig 2016.
Halos gyud dili ko makatuo. Tiaw mo nga ang Banco de Oro mideklarar ra og P400 mil nga kinitaan sa usa ka tuig? Kadako nianang bangko, kun itandi sa gamay kaayong baligyaanan og kahimanan sa cellphone, pero mikita og P1.2 million?
Nindot kaayo ang maong kalamboan kay magamit kini ni Mayor Tomas Osmeña sa iyang paggukod sa BDO nga gipasanginlan niya wala mobayad sa tukma nga buhis ngadto sa dakbayan sa Sugbo.
***
Wala ko malipay kay samtang busy kaayo ang mayor sa pagpaninguha nga mosaka ang koleksyon sa buhis, ang iyang mga sakop ingon sa nagmika ra.
Makasabot ko nga dili maato sa mayor ang tanang gimbuhaton ug magkinahanglan siya og pag-abag, labi na sa city administrator nga usahay tawgon og "little mayor." Kaniadtong Domingo, nakaagi ko sa Tomas Abella Street sa Taboan ug nakita nako nga ang mga aseras sa maong dapit giukopar na sa mga tindahan.
Nakaingon ko nga adunay kakuwangan si Mayor Osmeña kay siya ug si City Administrator Nigel Paul Villarete napakyas sa pagmando sa City Hall clearing team nga hawanan gyud ang mga aseras aron anha moagi ang mga tawo.
Unta makahuna-huna si Mayor Osmeña nga kon pasagdan ra kining mga mapahimuslanong tag-iya og tindahan ingon man panimalay daplin sa karsada, moabot ang higayon nga mogamay na ang atong mga karsada sa pagpanglabay sa katuigan.
***
Nakakita gyud og maayong isyu ang kontra ni Mayor Osmeña nga si Presidential Assistant for Visayas Michael Lloyd Dino pinaagi sa pagkuwestyon sa pagtambong sa mayor sa pagsubo sa Cebu City-Cordova Bridge karong Huwebes.
Matud ni Dino nga si Tommy kaniadto dihang kongresista pa, supak sa pagmugna sa Cordova-Cebu City Bridge kay dili na makaagi ang mga barko nga mosulod sa pantalan sa dakbayan.
Gisugyot kaniadto ni Tommy ang Ro-Ro type vessel nga maoy maayong ipa-operate kay duol ra kaayo ang biyaheon niini gikan sa Shell Island nga atbang ra sa Carbon Market ug paingon dinhi sa dakbayan.
Gitug-an ni Mayor Osmeña nga motambong siya sa pagsubo sa Cordova-Cebu City Bridge nga tambongan usab ni Presidente Duterte karong Huwebes. Wala na kaayo motubag si Osmeña sa pagkuwestyon ni Diño sa iyang pagtambong.
Ang desinyo unta sa taytayan, adunay duha ka lutsanan sa habig dinhi sa dakbayan sa Sugbo. Ang usa ka lutsanan unta anha sa Ermita, ug ang usa adto sa South Road Properties (SRP).
Kini aron nga ang mga dia dinhi sa downtown area sayon ra nga makaagi sa bridge agi sa ganghaan diha sa Ermita, unya ang gikan sa Talisay adto moagi sa lutsanan sa SRP.
Dili na madayon paghimo'g lutsanan diha sa Ermita kay gisupak kini sa mayor.