Wa pay narelibohan
ARANGKADA - Leo Lastimosa (The Freeman) - November 8, 2016 - 12:00am

Gawas sa mga sakop sa Criminal Investigation and Detection Group sa Eastern Visayas nga nakaapil sa operasyon nga nakapatay sa mga piniriso nga silang Mayor Rolando Espinosa Jr. ug Raul Yap niadtong Sabado sa kadlawon sud sa iyang selda sa Leyte Sub-Provincial Jail sa Baybay City sa Leyte, angay sang imbestigahon ang mga tagduma sa prisohan.

Kay kon tinuod ang kasayuran nga gipatuyangan silang Espinosa ug Yap sa paghupot og mga armas ug drugas sud sa prisohan, nga maoy nakaaghat sa korte pagluwat og search warrants ug sa CIDG 8 paglusad sa operasyon, angay nga ang warden ug jail guards ikiha, panangtangon sa katungdanan ug silotan.

***

May susamang panghitabo sa niaging buwan sa Baybay City Jail, nga di layo sa nahitaboan ni Mayor Espinosa ug nahilambigit sab sa giingong sindikato sa drugas sa iyang anak. Napatay ang piniriso nga gidudahang drug lord nga, sama sa mayor, giluwatan sab og search warrant sa korte kay gipasanginlan nga nagpadayon sa ilegal niyang negosyo sud sa prisohan.

Ang kamatayon ni Ferdinand Balagtis, nga gipasanginlang usa sa sinaligan ni Kerwin Espinosa ug nakuhaan sab og kalibre .45 nga pistola ug mga pakete sa gidudahang shabu, nisangpot sa pagtaktak dayon sa Bureau of Jail Management and Penology  sa warden nga si Senior Jail Officer 4 Jimmy Topia ug sa tanang 15 ka jail guards.

***

Hangtod karon, tulo ka adlaw na human sa duguong insidente, wa pay bisan usa sa mga nahilambigit nga narelibohan sa katungdanan. Ang Kapitolyo sa Leyte nga nagbase sa Tacloban City nangimbestigar tuod dayon sa insidente apan wa pa manghilabot sa warden nga si Homobono Bardillon ug sa iyang jail guards.

Sa pikas nga bahin, bisan sa isog nga mga panganti sa kadagkoan sa Philippine National Police sa paglusad dayon og makuting pakisusi sa insidente, wa pay narelibohan sa 24 ka sakop sa CIDG 8, Maritime Police, ug Baybay City Police nga nironda sa prisohan.

***

Niay mas makahuloganon nga lakang sa gobyerno, labaw sa pagpadayag og kahinugon sa kamatayon ni Mayor Espinosa nilang Interior Secretary Mike Sueno, PNP Director General Bato dela Rosa, Albuera Police Chief Jovie Espenido, ug Communications Secretary Martin Andanar: Ang gitahasan sa Kampo Crame pag-imbestigar sa insidente mao ang ulohang buhatan sa CIDG nga gipangulohan ni Chief Supt. Roel Obusan.

Kon determinado ang mga liderato sa Department of Interior and Local Government ug PNP pagsusi sa tinuod nga mga sirkumstansiya sa kamatayon ni Mayor Espinosa ug kon tinuod nga nahinugon sa kahigayonan nga makahatag sa iyang testimoniya sa korte batok sa mas dagkong haligi sa ilegal nga drugas, nganong ang CIDG ra man ang gipa-imbestigar sa ilang kaugalingong mga sakop?

leo_lastimosa@abs-cbn.com

 

WAY PAY
Philstar
Facebook
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with