Temporaryo rang away
ARANGKADA - Leo Lastimosa (The Freeman) - August 16, 2016 - 12:00am

Pila ka adlaw na lang sa di pa ang makasaysayanon nga pagsugod sa pormal nga sabutsabot sa kalinaw tali sa gobyerno ug sa mga rebeldeng komunista sa Oslo, Norway, nakadawat og sipa nga sagpa si Presidente Rodrigo Duterte gikan sa Communist Party of the Philippines nga gipangulohan sa iyang kanhi magtutudlo nga si Jose Ma. Sison.

Di lang usa kon dili duha gyod ka sagpa: Una, gibakwi sa CPP ang ilang suporta sa kampanya sa ilegal nga drugas nga ilang gihulagway nga kontra katawhan ug kontra demokrasya ug si Duterte gipasanginlang hubog sa gahom; ug ikaduha, gikondenar nila ang hukom ni Duterte pagpalubong sa patayng lawas ni kanhi Presidente Ferdinand Marcos sa Libingan ng mga Bayani.

* * *

Sa kampanya batok sa ilegal nga drugas, gilokan tingali ang CPP nga susama ang ilang baruganan sa Estados Unidos nga nipadayag og kaalarma sa sunudsunod nga patay sa gidudahang mga durugista ug niawhag nga subayon ang sistema sa hustisya ug mga balaod ug tahuron ang tawhanong mga katungod.

Naghisgot ang US sa posibleng pagputol sa hinabang militar. Nga mao tingali hinungdan nga di insulto ang tubag sa Malakanyang kon dili pasalig nga gimandoan ang kapolisan pagsusi sa extrajudicial killings ug pagsilot sa mga responsable. Seryuso gyod tingali ang kamandoan kay human sa kapin sa buwan sa sunudsunod nga patay wa pay bisan usa ka gidudahang vigilante ang nadakpan ug nakiha.

* * *

Gireserba sa CPP ang labing kusganong mga pagsaway sa kontrobersiya sa pagtugot ni Duterte nga ilubong si Marcos sa LNMB:

• Gipasanginlan nila si Duterte nga gahi og ulo ug gustong makalimtan sa katawhan ang diktadurang Marcos aron nga di sila kasupak kon dayunon niya pagdeklarar ang martial law;

• Gitumbok si Duterte nga nipatigbabaw sa pamakak ni Marcos sa iyang pekeng medalya ug pahoy nga Maharlika guerilla unit; ug

• Gibasol si Duterte sa pagtabang pagpapas sa duguong rekord sa pagpanghasi, pagpangawat ug pagpaantos ni Marcos sa mga Pilipinhon sa 14 ka tuig nga diktadura.

* * *

Bisan ning way pupanagana nga paglampaso sa CPP ni Duterte, nagtuo kong mahinayon gihapon ang pagsugod sa sabutsabot sa kalinaw sa Oslo karong Sabado. Lawom kaayo ang panaghigalaay nilang Duterte ug Sison ug talagsaon kaayo ang kahigayonan pag-umol og kauyonan sa kalinaw nga ilang ilabay sa bintana tungod lang sa kasamtangang away.

Kay kon imong palawman pagsusi di ingon ana kadako ang ilang away. Nisibaw ang mga pagsaway sa CPP ni Duterte human siya nisuroy sa mga kampo sa militar ug nisaad pagdoble sa suholan ug pagbuhong sa mga benepisyo sa kasundalohan. Gipahinumdoman lang tingali siya nilang Sison nga kon mamangka man sa duha ka sapa angayng susihon ni Duterte unsay tinuod nga gipitik sa iyang kasingkasing.

Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with