Pakyas sa drugas

Di ni makiangayon alang ni kanhi Kongresista Antonio Cuenco. Kay mokalit na man lang og ka-eksperto ang tanan inigkahuman na sa hitabo. Maong sayon na kaayo ron ang pagkuwestiyon sa kalidad sa imbestigasyon nga iyang giduma 15 ka tuig ang nilabay batok sa gipasanginlang drug lord nga si Peter Lim.

Tinuod nga way klaro ang resulta sa imbestigasyon sa House Committee on Dangerous Drugs nga gipangulohan ni Cuenco. Bisan sa kaseryuso sa mga pasangil ug sa kadaghan sa mga gipasanginlan, way bisan unsang kaso nga napasaka sa korte batok nilang Lim ug ubang gipasanginlang drug lords sa Sugbo. Apan di hingpit nga matulisok si Cuenco.

***

Sa kabanggiitan sa mga kongresista ug mga senador niadtong 2001, si Cuenco ra ang nangisog sa pagdiskurso paghingan nilang Lim, Michel Lhuillier, Marlyn Rosal, Chovy Lim, Victor Lim, Jun Opone, Alex Chiongbian, Bo Oyao, PO3 Mario Cuerda ug PO3 Richard Quimod ug pagpangu sa imbestigasyon batok nila.

Mahimong kakuwang sa kasayuran ug mga saksi ang nakababag sa imbestigasyon. Gibasol ni Cuenco ang kakuwang og tabang sa Philippine National Police ug National Bureau of Investigation. O tingali di ingon ana ka-komprehensibo ang mga probisyon sa karaang Anti-Money Laundering Act. O tingali kuwang lang gyod ang panahon ug lahutay sa iyang kaubanang kongresista.

***

Nga abunda sa imbestigasyon sa Senado sa mga pasangil batok ni kanhi Bise Presidente Jejomar Binay. Ang orihinal nga imbestigasyon sa giingong overpricing sa Makati City Hall building nananga sa giingong “Hacienda Binay” sa Batangas ug sa gikuwestiyong mga transaksiyon sa Boy Scouts of the Philippines nga gipangulohan ni Binay sud sa duha ka dekada.

Maong sayon na ron ang pag-ingon nga kon si Cuenco sama pa unta kakuti-kutihan sa mga senador nga silang Sonny Trillanes, Alan Peter Cayetano ug Koko Pimentel namunga gyod unta og mga kaso sa korte ang expose batok sa drugas.

***

Kon sublion ni Presidente Rodrigo Duterte ang imbestigasyon sa Kongreso, iyang mahaibaw-an nga wa magnihit sa mga detalye ang kanhi bodyguards ni Lim:

Si Bernard Liu niingon nga katulo siya gipakuyog ni Lim sa Hong Kong sa 1989-1996 pagkuha og 10 ka kilong shabu matag biyahe gikan ni David Kam; ug

Si Ananias Dy nitug-an nga gipalusot ang ilang golf bags nga puno sa shabu sa konsabong taga Customs ug Immigration ug nga siyay gipada og 48 ka kilong shabu nilang Lim ug Ben Go paingon sa Manila apan nasakmit sa Economic Intelligence and Investigation Bureau niadtong Disyembre 1991.

Gawas nga napakyas pagsusi sa mga pasangil, ang mga ahensiya sa gobyerno napakyas sab pagpanalipod ni Dy nga gipusil-patay niadtong Hulyo 2006 ug ni Liu nga giluba niadtong Septiyembre 2011.