Masaligon si suspended Cebu City Mayor Mike Rama nga di masumpayan ang iyang 60 ka adlaw nga preventive suspension nga gitakdang mapupos na sunod semana. Nipahibawo si Rama nga gipasaligan siya sa mga abogado nga di mahimong ipahamtang ang sunudsunod nga mga suspenso kay susama ra nga gitaktak siya sa katungdanan.
Matod ni Rama labihang daghana sa iyang kalihokan bisan nasuspenso nga wa siyang kamatngon nga hapit na diay siya mabalik sa katungdanan. Nihunong siya sa pag-ihap ug hingpit nang gitugyan sa iyang mga abogado ang pagpanalipod sa iyang mga interes. Nipadayag hinuon og kahimangod nga napakyas sila pagkuha og temporary restraining order batok sa suspenso.
***
Nisukwahi hinuon sa kamasaligon ni Rama ang kanhi Cebu City legal officer nga si Atty. Ralph Sevilla. Matod ni Sevilla way balaod nga nagdili og duha ka sunudsunod nga suspenso. Labi na kon laing kaso ang tinubdan sa sunod nga suspension order batok niya.
Di silot ang duha ka buwan nga suspenso ni Rama. Gipahamtang sa Malakanyang aron pagpugong niya sa pag-influencia sa imbestigasyon sa kasong administratiba nga gipasaka ni Barangay Kapitan Vic Buendia pinaagi sa pagguba sa mga ebidensiya o paghulga sa mga saksi. Ang sunod nga posibleng suspenso ni Rama mahimong silot na kon mapamatud-an nga sad-an sa uban pang mga kaso nga nag-ung-ong batok niya.
***
Para ni kanhi Cebu City Mayor Tommy Osmeña ang kinakusgang kaso batok ni Rama mao ang pagdawat niya og P20,000 nga calamity assistance niadtong Disyembre 2013 bisan wa siya mabiktima sa bagyong Yolanda sa Nobyembre ug sa nag-unang linog sa Bohol ug Sugbo sa Oktubre sa samang tuig.
Matod ni Osmeña mas dako pa ang hinabang nga nadawat nilang Rama, Bise Mayor Edgar Labella ug kaubanan kay sa tinuod nga mga biktima sa katalagman. Gitumbok niya nga P10,000 ra ang nadawat sa mga tagtungod sa matag biktima nga namatay sa pagkahugno sa Pasil Fish Market sa linog niadtong Oktubre 2013.
***
May mga sugyot nga nadawat si Rama nga usa sa makahatag niya og ideya may lain pa bang suspenso nga nag-ung-ong batok niya mao ang Commission on Elections. Nga kinahanglang pangayoan og exemption sa bisan unsang suspenso nga ipahamtang sa Malakanyang o sa Department of Interior and Local Governments sa nagsugod na nga election period.
Makalusot hinuon sa COMELEC ang mga suspenso nga imando sa Ombudsman o Sandiganbayan, nga independenteng mga sanga sa gobyerno. Nikumpisal si Osmeña nga wa siyay kasayuran unsay umaabot sa mga kaso ni Rama bisan nanghinaot nga di na makabalik si Rama sa City Hall hangtod sa piniliay sa Mayo 9. Apan nipasidaan nga batokan niyang mga maniobra sa laktod nga pagtangtang niya sa gahum.