Sa makausa pa, nauwawan na sab ang Land Transportation Franchising and Regulatory Board. Napapas ang bisan unsang pagduda sa ilang katapolan ug kalangayan sa pagtakda sa labing makiangayon nga plitehan sa mga sakyanang pamasahero atubangan sa pagtibugsok sa presyo sa lana. Dihang naapsan sa pipila ka transport groups sa pagboluntaryo paglaslas sa minimum nilang plitehan tungod sa kabarato na sa krudo ug gasolina.
Sa kataposang kuwentada, kapin na sa 70% sa presyo sa lana ang napapas sukad sa pagsugod og tidlom sa presyo niadtong Hunyo 2014. Mas papas pa gyod ang tidlom sa niaging upat ka buwan kay nikabat og 40%. Apan wa ning kapugwat sa LTFRB.
* * *
Gipasagdan nilang LTFRB chairman Winston Gines ug kaubanan nga maglaway lang ang mga pasahero sa dakong benepisyo sa mas baratong lana. Bisan hagbay rang napasaka ang pormal nga petisyon ni Kongresista Manny Iway sa Negros Oriental paglaslas sa plitehan sa taxis, PUJs ug buses, wa mag-apura ang LTFRB paghimo sa batakan nilang trabaho.
Human nangiyugpos sud sa dul-an sa tuig human nadawat ang petisyon ni Iway, nipasigarbo si Gines nga laslasan nang plitehan sa taxis karong buwana ug ang plitehan sa PUJs sunod buwan. Apan tungod sa mas abtik nga lakang sa transport groups, mas unang mapatuman ang 50 sentabos nga laslas sa plitehan sa PUJs karong adlawa.
* * *
Hinaot nga ang lakang sa transport groups di maniobra aron lang sa pagbangil sa mas dakong us-os sa plitehan nga gipangayo ni Iway, kansang pormal nga petisyon nahusay na sa LTFRB sa niagi pang tuig.
Gawas pa, maglaway lang ang mga Sugbuanon ug ubang mga pasahero sa Kabisay-an ug Mindanao sa pasiunang laslas sa plitehan. Kay ang makapahimus mao rang mga pasahero sa Metro Manila ug sa mga rehiyon 3 ug 4. Samtang managsamang P7 minimum nga plitehan sa PUJs sa Sugbo ug kaulohan, alang sa upat ka kilometro hinuon sa ila kon itandi sa lima ka kilometro sa ato, nabiyaan na og kapin P100 ang minimum natong suholan.
* * *
Taas na uyamot ang lista sa mga pakauwaw sa LTFRB sa plitehan. Sa makadaghan nang higayon, ang bus operators sa Sugbo nangolekta og plitehan nga mas ubos kay sa taripa sa LTFRB. Maong bisan aprobahan pa sa LTFRB ang petisyon ni Iway paglaslas sa plitehan sa buses, mas ubos gihapon ang aktuwal nga plitehan nga gikolekta sa buses sa Sugbo.
Sa ato pa, naghangad rang LTFRB, mahimong nanguha ra diay sa tumoy sa ilang buhok, sa pagtakda sa plitehan sa buses dinhi sa ato. Kay nakaginansiya man ang bus operators bisan mas ubos nga plitehan ang gikolekta, klarong wa matarung pagkuwenta sa LTFRB ang labing makiangayon nga plitehan sa mga pasahero.