Pilde na. Napusgay nang gidamgo sa Miami Heat nga ikatulong sunudsunod nga kampeyonato sa National Basketball Association. Bisan unsaon og hubad ang duha ka sunudsunod nga dominanteng kadaogan sa San Antonio Spurs sa korte sa Heat, di mahitabong maharos nilang Lebron James ug kaubanan ang nahibiling tulo ka duwa sa NBA Finals.
Di tang kapaabot nga ipakayab na sa Heat ang puti nga toalya sa Game 5 sa korte sa Spurs karong Lunes sa alas-8 sa buntag (oras sa Pilipinas). Apan napamatud-an na sa Spurs nga mas determinado sila ug busa wa nay makababag sa ilang pagsakmit sa labing taas nga pasidungog sa kalibotan sa basketbol karong tuiga.
***
Unsa may nahitabo? Nganong nikalit man lang og sulbong ang Spurs nga bisag unsaon sa Heat di na mang kaapas sa morang kilat nilang mga pasa ug di na man kasagang sa nanud nilang bola?
Di ba gipakauwawan man sa Heat ang Spurs sa finals sa niaging tuig? Gikunis-kunis man gani sa Heat ang garbo nilang Tim Duncan ug kaubanan pinaagi sa pagpapas sa ilang labaw dihang pila na lang ka segundo ang nahibilin sa duwa ug giandam nang mga dayan-dayan sa pagkorona sa Spurs? Di ba ang Spurs man untay gidudahan nga di nang kabawi sa diriyot nilang pagdaog ug ang Heat maoy gihatagan sa tanang bentaha nga makasubli pagpaila nila kinsay tinuod nga hawod?
***
Dapiton nakong imong pagtagad sa duha ka mahinungdanong bahin sa series nga maoy nitakda sa sangpotanan sa nagpadayong finals series:
•Dayong tapos sa 4th quarter sa Game 2, nasipyat ang upat ka sunudsunod nga free throws nilang Tony Parker ug Duncan nga gawas nga nakapadaog sa Heat, nakapawagtang pa gyod sa homecourt advantage sa Spurs ug nakapakumbinser sa Heat nga, sama sa niaging tuig, kontrolado nilang Spurs; ug
•Third quarter sa Game 3, dihang ang 21 puntos nga labaw sa Spurs sa first half nihiyos ngadto sa pito, inay mokaging nibalik ang Spurs sa lantip nilang pinasahay nga nakapasud pagbalik sa ilang bola ug nakapaburot pagbalik sa ilang labaw.
***
Sakit ning angkunon kay fan man ko sa Heat: Nakatimbakuwas nang Spurs sa ilang pagkapukan sa Hunyo sa niaging tuig ug di na nila hatagan og higayon ang Heat nga makahulga nila pag-usab. Mahimong basulon sa fans sa Heat ang injuries nilang Dwyane Wade ug Chris Andersen ug ang gitay-an nga duwa ni Mario Chalmers. Apan injured sab si Parker dihang napilde ang Spurs sa niaging finals.
Bisan sa ilang kapildehan, napamatud-an ni James nga siya gihapon ang labing maayong basketbolista sa planeta. Apan di siya mahimong mag-inusara pagsakbang sa makalilisang nga makina sa Spurs nga giumol aron pagpapas sa indibiduwal niyang ka-dominante.
***
Email: leo_lastimosa@abs-cbn.com