CEBU, Philippines - Tungod sa dautang dagan sa panahon, dul-an 800 ka pasahero ang wala makadayon og byahe sa lain-laing destinasyon gikan sa Sugbo. Matud sa hepe sa Philippine Coast Guard Central Visayas Commodore William Melad, base sa alas-12 sa udto nga tala sa ilang buhatan, dunay 771 ka pasahero ang stranded.
Dunay 37 ka barko ang wala palargaha sa Coast Guard tungod sa bagyong Agaton, ang labing unang bagyo sa nasud karong tuiga. Siyam ka motorbanca ang wala usab palargaha tungod sa kamaot sa panahon nga nakaingon sa mga dagkong bawod sa dagat. Dugang sa Coast Guard, dunay 43 ka rolling cargo vessels nga wala palargaha paingon ug gikan sa Sugbo ug Central Visayas.
Samtang mibutyag si Melad nga wala gihapon mabira ang duha ka barkong de pasahero nga nasangad sa Bohol ug Lapu-Lapu City niadtong Enero 15.
Ang MV Joyful Stars, gipanag-iya sa Roble Shipping, nasangad sa Bantolinao Point duol sa Lapu-apu City ug ang MV Our Lady of All Nations, gipanag-iya sa Medallon Transport Incorporated didto masangad sa Danajon Bank duol sa Bohol.
Sabado sa buntag nahuman og hakot ang tanang 90 ka pasahero gikan sa MV Our Lady of All Nations, matud ni Melad. (BANAT NEWS)