Kelot, inaresto sa pagnakaw ng motor ng kapitbahay

MANILA, Philippines — Hindi na lumayo pa ang isang lalaki na gumawa ng pagnanakaw nang maisipan nitong tangayin ang motorsiklo ng katabi niyang bahay na tinakpan lang niya ng kapote naganap kahapon ng madaling araw sa Amore Subdivision, Brgy. Mulawin, Tanza, Cavite.

Agad na naaresto ang suspek na si alyas “Allan”, 42, construction worker residente ng lugar.

Base sa ulat ng pulisya, ala-1:30 ng madaling araw nang tangayin ng suspek ang motor na Honda Click (286-PGH) ng kapitbahay na si alyas “Aldrin”, 27, na nakaparada sa tapat ng bahay nito.

Hinanap ng biktima sa loob ng kanilang subdivision ang kanyang motor at nagulat ito ng makita sa harap ng bahay ng suspek na kapitbahay niya ang kaniyang motor na nakatakip ng kapote.

Agad niya itong isinumbong sa mga pulis kaya agad itong naaresto. Kinasuhan ang suspek ng carnapping.