Red Strings, ibinida ang kanilang teorya

Ibinahagi ng OPM band na The Red Strings ang iba’t ibang kwento at yugto ng pag-ibig sa kanilang debut EP na The Red String Theory, na inilabas kasabay ng kanilang kakatapos lang na The Live Sessions Tour.

Isinulat ng mga miyembro na sina Gello Marquez, Cedryck Guda, Llana Claire Catudio, Nicholas De Rosales, Risen Santos, at Liam Barba ang lahat ng anim na awitin sa EP na umani na ngayon ng halos 5 million all-time Spotify streams.

Kabilang dito ang tatlong bagong kanta na Alanganin, Jupiter at Kalendaryo, kasama ang nauna nilang singles na Nasa Ulap, Kupido at Asado. Nagsilbing producer ng EP ang DNA Music label head na si Gab Tagadtad.

Naging pagkakataon din ang The Live Sessions Tour upang mas mapalapit ang banda sa kanilang fans sa pamamagitan ng libreng mall shows sa Valenzuela, Olongapo, Bataan, Telebastagan, Tarlac, Clark at Baliwag. Nakisaya rin sa tour ang ABS-CBN Music artists na sina Bryan Chong, BRYN, Cesca, Chie, Erghyll, Jarea, JEL REY, Lala Vinzon, Off To Aurora, Sarvi, Sassa at Yellow Pad.

Nabuo ang The Red Strings sa reality docu-series ng ABS-CBN Entertainment na The Next Big Band. Hango ang pangalan ng banda sa konsepto ng red string of fate na sumasalamin sa paniniwalang itinadhana silang magtagpo at magsama-sama upang gumawa ng musika.